ജിദ്ദ: സൗദി അറേബ്യയുടെയും റഷ്യയുടെയും തലസ്ഥാനങ്ങള് തമ്മിലുള്ള വ്യോമബന്ധം കൂടുതല് സുദൃഢമാക്കിക്കൊണ്ട് ജിദ്ദ കിങ് അബ്ദുല് അസീസ് അന്താരാഷ്ട്ര വിമാനത്താവളത്തില്നിന്ന് മോസ്കോയിലേക്ക് നേരിട്ടുള്ള വിമാന സര്വിസുകള് ആരംഭിച്ചു. പ്രമുഖ ബജറ്റ് എയര്ലൈനായ ഫ്ലൈനാസുമായി സഹകരിച്ചാണ് ഈ പുതിയ സര്വിസ് ക്രമീകരിച്ചിരിക്കുന്നത്.
മോസ്കോയിലെ വ്നുക്കോവോ (Vnukovo) അന്താരാഷ്ട്ര വിമാനത്താവളത്തിലേക്കാണ് ജിദ്ദയില്നിന്ന് നേരിട്ടുള്ള സര്വിസ് നടത്തുന്നത്. പ്രാഥമിക ഘട്ടത്തില് ആഴ്ചയില് മൂന്ന് സര്വിസുകള് വീതമാണ് ഫ്ലൈനാസ് ഷെഡ്യൂള് ചെയ്തിരിക്കുന്നത്. ഈ മാസം ആദ്യം റഷ്യന് എയര്ലൈനായ അസിമുത്ത് (Azimuth) സര്വിസ് തുടങ്ങിയ മഖച്കല, മിനറല്നി വോഡി എന്നീ നഗരങ്ങള്ക്ക് ശേഷം ജിദ്ദയില്നിന്ന് നേരിട്ട് ബന്ധിപ്പിക്കുന്ന മൂന്നാമത്തെ റഷ്യന് ലക്ഷ്യസ്ഥാനമായി ഇതോടെ മോസ്കോ മാറി.
സൗദി ടൂറിസം അതോറിറ്റിയുടെയും എയര് കണക്റ്റിവിറ്റി പ്രോഗ്രാമിന്റെയും സംയുക്ത സഹകരണത്തോടെയാണ് ഈ പദ്ധതി യാഥാര്ഥ്യമായത്. റഷ്യയില് നിന്നുള്ള വിനോദസഞ്ചാരികളെയും തീര്ഥാടകരെയും കൂടുതല് ആകര്ഷിക്കാനും ഇരുരാജ്യങ്ങളും തമ്മിലുള്ള സാമ്പത്തിക-സാംസ്കാരിക വിനിമയം വര്ദ്ധിപ്പിക്കാനും ഈ പുതിയ വ്യോമപാത സഹായിക്കും.
സൗദി അറേബ്യയുടെ ദേശീയ ഗതാഗത, ലോജിസ്റ്റിക് സ്ട്രാറ്റജിയുടെ ഭാഗമായുള്ള ഏവിയേഷന് പ്രോഗ്രാമില് ജിദ്ദ എയര്പോര്ട്ട് കമ്പനി വലിയ പ്രാധാന്യമാണ് നല്കുന്നത്. ഈയിടെ പ്രതിവര്ഷം അഞ്ച് കോടി യാത്രക്കാര് എന്ന ചരിത്രപരമായ നാഴികക്കല്ല് ജിദ്ദ വിമാനത്താവളം പിന്നിട്ടിരുന്നു. 2030-ഓടെ പ്രതിവര്ഷം 10 കോടി യാത്രക്കാരെ സ്വീകരിക്കാനാണ് വിമാനത്താവള അധികൃതര് ലക്ഷ്യമിടുന്നത്.
വരും വര്ഷങ്ങളില് ജിദ്ദയെ ലോകത്തിലെ 150-ലധികം അന്താരാഷ്ട്ര നഗരങ്ങളുമായി നേരിട്ട് ബന്ധിപ്പിക്കാനാണ് വിപുലമായ പദ്ധതികള് ആവിഷ്കരിച്ചിരിക്കുന്നത്. സൗദിയുടെ തന്ത്രപ്രധാനമായ ഭൂമിശാസ്ത്രപരമായ സ്ഥാനം പ്രയോജനപ്പെടുത്തി ലോകത്തെ മികച്ച വിമാനത്താവളങ്ങളിലൊന്നായി ജിദ്ദയെ മാറ്റുന്നതിന്റെ ഭാഗമായാണ് മോസ്കോയിലേക്കുള്ള ഈ പുതിയ ചുവടുവെപ്പ് വിലയിരുത്തപ്പെടുന്നത്.
Related News
