മലപ്പുറം: മലപ്പുറം ജില്ലാ പഞ്ചായത്തിന്റെ അധ്യക്ഷനായി പി.എ. ജബ്ബാര്‍ ഹാജിയെ തിരഞ്ഞെടുത്തു. ജില്ലാ പഞ്ചായത്ത് മുന്‍ അധ്യക്ഷനായിരുന്ന അന്തരിച്ച എ.പി. ഉണ്ണികൃഷ്ണന്റെ മകള്‍ അഡ്വ. എ.പി. സ്മിജിയാണ് വൈസ് പ്രസിഡന്റ്. ജില്ലാ പഞ്ചായത്ത് ഭരണസമിതിയിലേക്കുള്ള മുസ്ലിം ലീഗ് ഭാരവാഹികളെ പാണക്കാട് സയ്യിദ് സാദിഖലി ശിഹാബ് തങ്ങളാണ് പ്രഖ്യാപിച്ചത്. ചരിത്രത്തിലാദ്യമായി പ്രതിപക്ഷമില്ലാത്ത ഒരു ഭരണസമിതി എന്ന പ്രത്യേകതയുമായാണ് പുതിയ ടീം ചുമതലയേല്‍ക്കുന്നത്.

ആരോഗ്യ-വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാനായി പി.കെ അസ്ലുവും വികസന സ്റ്റാന്റിംഗ് കമ്മിറ്റി ചെയര്‍പേഴ്സണായി ഷാഹിന നിയാസിയും പാര്‍ലമെന്ററി പാര്‍ട്ടി ലീഡറായി വെട്ടം ആലിക്കോയയും ഡെപ്യൂട്ടി ലീഡര്‍റായി യാസ്മിന്‍ അരിമ്പ്രയും സെക്രട്ടറിയായി കെ.ടി. അഷ്റഫും വിപ്പായി ഷരീഫ് കൂറ്റൂറും ട്രഷററായി ബഷീര്‍ രണ്ടത്താണിയും തെരഞ്ഞെടുക്കപ്പെട്ടു.

ഇത്തവണത്തെ മലപ്പുറം ജില്ലാ പഞ്ചായത്ത് ഭരണസമിതി ഇന്ത്യന്‍ ജനാധിപത്യത്തിലെ തന്നെ അപൂര്‍വ്വ കാഴ്ചയാവുകയാണ്. ജില്ലയിലെ 33 ഡിവിഷനുകളിലും യുഡിഎഫ് വിജയിച്ചതോടെ പ്രതിപക്ഷ നിര ശൂന്യമായി. കഴിഞ്ഞ തവണ രണ്ട് ഡിവിഷനുകളില്‍ ജയിച്ച് സാന്നിധ്യമറിയിച്ച എല്‍ഡിഎഫിന്, 2025-ലെ ഈ തെരഞ്ഞെടുപ്പില്‍ ആ സീറ്റുകള്‍ കൂടി നഷ്ടമായി. മലപ്പുറത്തെ യുഡിഎഫിന്റെ ഉരുക്കുകോട്ട കൂടുതല്‍ ശക്തമാണെന്ന് തെളിയിക്കുന്നതാണ് ഈ സമ്പൂര്‍ണ്ണ വിജയം.