മക്ക: മസ്ജിദുല് ഹറാമിന്റെ മുകള് നിലയില് നിന്ന് ഒരാള് താഴേക്ക് ചാടി. മസ്ജിദുല് ഹറാമിനുള്ളിലെ 'മതാഫ്' (കഅബയെ പ്രദക്ഷിണം ചെയ്യുന്ന സ്ഥലം) ഏരിയയിലേക്കാണ് മുകള് നിലയില് നിന്ന് ഇയാള് ചാടിയത്. താഴേക്ക് പതിച്ച വ്യക്തി നിലത്ത് വീഴുന്നത് തടയാന് ശ്രമിക്കുന്നതിനിടെ ഡ്യൂട്ടിയിലുണ്ടായിരുന്ന സുരക്ഷാ ഉദ്യോഗസ്ഥനും പരിക്കേറ്റു. താഴേക്ക് ചാടിയ വ്യക്തിയെയും പരിക്കേറ്റ ഉദ്യോഗസ്ഥനെയും ചികിത്സയ്ക്കായി ആശുപത്രിയിലേക്ക് മാറ്റി.
താഴെ തിരക്കുള്ള സമയമായിരുന്നതിനാല്, വീഴുന്ന ആള് മറ്റുള്ളവരുടെ ദേഹത്ത് പതിക്കാതിരിക്കാനും അപകടം ഒഴിവാക്കാനും ശ്രമിക്കുന്നതിനിടെയാണ് സുരക്ഷാ ഉദ്യോഗസ്ഥന് പരിക്കേറ്റത്. ഉദ്യോഗസ്ഥന്റെ മനസ്സാന്നിധ്യത്തെ പലരും സോഷ്യല് മീഡിയയിലൂടെ അഭിനന്ദിച്ചു. ഈ വ്യക്തി എന്തിനാണ് താഴേക്ക് ചാടിയതെന്നതിനെക്കുറിച്ച് സൗദി പോലീസ് അന്വേഷണം ആരംഭിച്ചിട്ടുണ്ട്. മാനസികാസ്വാസ്ഥ്യമുള്ള ആളാണോ അതോ മറ്റെന്തെങ്കിലും കാരണമാണോ എന്ന് പരിശോധിച്ചുവരികയാണ്.
ആശുപത്രിയില് പ്രവേശിപ്പിക്കപ്പെട്ട സുരക്ഷാ ഉദ്യോഗസ്ഥന്റെ പരിക്ക് ഗുരുതരമല്ലെന്നാണ് പ്രാഥമിക റിപ്പോര്ട്ടുകള് സൂചിപ്പിക്കുന്നത്. താഴേക്ക് ചാടിയ വ്യക്തിയുടെ ആരോഗ്യനിലയെക്കുറിച്ച് കൂടുതല് വിവരങ്ങള് അധികൃതര് പുറത്തുവിട്ടിട്ടില്ല.
സംഭവവുമായി ബന്ധപ്പെട്ട നിയമനടപടികള് നിലവിലുള്ള ചട്ടങ്ങള്ക്കനുസൃതമായി പൂര്ത്തിയാക്കി വരികയാണെന്ന് അധികൃതര് അറിയിച്ചു. മക്കയിലെ ഹറം പള്ളിയില് ഇത്തരം സംഭവങ്ങള് ഉണ്ടാകാതിരിക്കാന് സുരക്ഷാ സേന അതീവ ജാഗ്രത പുലര്ത്താറുണ്ട്. ഇതിന് മുന്പും സമാനമായ ഒറ്റപ്പെട്ട സംഭവങ്ങള് റിപ്പോര്ട്ട് ചെയ്യപ്പെട്ടിട്ടുണ്ട്.
Related News
