ജിദ്ദ: നൂറ്റാണ്ടുകള്ക്ക് മുമ്പ് കപ്പല് മാര്ഗ്ഗം ജിദ്ദ തീരത്തിറങ്ങി വിശുദ്ധ മക്കയിലേക്ക് കാല്നടയായി യാത്ര ചെയ്തിരുന്ന ഹജ്ജ് തീര്ത്ഥാടകരുടെ സ്മരണകള് ഉണര്ത്തി 'ഹിസ്റ്റോറിക് ഹജ്ജ് റൂട്ട്' പദ്ധതിക്ക് തുടക്കമായി. സൗദി സാംസ്കാരിക മന്ത്രാലയത്തിന്റെ നേതൃത്വത്തില് ജിദ്ദയുടെ ചരിത്ര പൈതൃകം വീണ്ടെടുക്കുന്നതിനും ആഗോള വിനോദസഞ്ചാര ഭൂപടത്തില് അടയാളപ്പെടുത്തുന്നതിനുമുള്ള വിപുലമായ പദ്ധതിയുടെ ഭാഗമാണിത്.
ചരിത്രപ്രസിദ്ധമായ ബാബ് അല് ബിന്തില് ആരംഭിച്ച് ബാബ് മക്കയില് അവസാനിക്കുന്ന തരത്തിലാണ് ഈ സാംസ്കാരിക പാത രൂപകല്പ്പന ചെയ്തിരിക്കുന്നത്. പണ്ട് കടല്മാര്ഗ്ഗം എത്തുന്ന ഹാജിമാര് കരയിലിറങ്ങിയിരുന്ന പ്രധാന കവാടമാണ് ബാബ് അല് ബിന്ത്. ജിദ്ദയില് നിന്ന് വിശുദ്ധ നഗരമായ മക്കയിലേക്കുള്ള യാത്രയുടെ കവാടമായി ബാബ് മക്ക ചരിത്രത്തില് അറിയപ്പെടുന്നു.
ഈ നടപ്പാതയിലൂടെയുള്ള യാത്ര തീര്ത്ഥാടകരെയും സന്ദര്ശകരെയും ജിദ്ദയുടെ പുരാതന പ്രതാപത്തിലേക്കാണ് കൂട്ടിക്കൊണ്ടുപോകുന്നത്. പാതയിലുടനീളം
അല് ഷൂന (പണ്ട് സുഗന്ധവ്യഞ്ജനങ്ങളും മറ്റു സാധനങ്ങളും സൂക്ഷിച്ചിരുന്ന പുരാതന ഗോഡൗണും ഇപ്പോള് പുരാവസ്തു കേന്ദ്രവുമാണിത്), ഉസ്മാന് ഇബ്നു അഫ്ഫാന് മസ്ജിദ് (ജിദ്ദയിലെ ഏറ്റവും പഴക്കം ചെന്ന പള്ളികളിലൊന്ന്), ബൈത് നസീഫ് (ആധുനിക സൗദി അറേബ്യയുടെ സ്ഥാപകന് അബ്ദുല് അസീസ് രാജാവ് താമസിച്ചിരുന്ന ചരിത്രപ്രധാനമായ കൊട്ടാരം), അല് അലവി മാര്ക്കറ്റ് (ജിദ്ദയിലെ ഏറ്റവും പഴക്കമുള്ള വാണിജ്യ തെരുവ്. ഇന്നും പഴയ തനിമയോടെ ഇത് സജീവമാണ്) തുടങ്ങിയ ചരിത്ര സ്മരണകളുറങ്ങുന്ന കേന്ദ്രങ്ങള് കാണാന് സാധിക്കും.
പുരാതന സ്മാരകങ്ങളുടെ തനിമ നിലനിര്ത്തിക്കൊണ്ട് തന്നെ അവയെ ആധുനിക രീതിയില് സംരക്ഷിക്കുകയാണ് ലക്ഷ്യം. മക്കയിലേക്കുള്ള പ്രധാന പ്രവേശന കവാടമെന്ന നിലയില് ജിദ്ദയുടെ ചരിത്രപരമായ പങ്ക് വരുംതലമുറയ്ക്കും വിദേശികള്ക്കും പരിചയപ്പെടുത്തുക, സൗദി വിഷന് 2030-ന്റെ ഭാഗമായി ജിദ്ദ ഹിസ്റ്റോറിക് ഏരിയയെ ലോകോത്തര ടൂറിസ്റ്റ് കേന്ദ്രമാക്കി മാറ്റുകയും ലക്ഷ്യമാണ്.
പുരാതന ശില്പകലയും മനോഹരമായ തടിയില് തീര്ത്ത ജനാലകളും കൊണ്ട് അലംകൃതമായ ഈ പാതയിലൂടെയുള്ള സഞ്ചാരം ഓരോ സഞ്ചാരിക്കും ഒരു ചരിത്രാനുഭവം തന്നെയായിരിക്കും.
ജിദ്ദ ഹിസ്റ്റോറിക്കല് ഏരിയയിലെ ഓരോ കെട്ടിടത്തിന്റെയും പള്ളിയുടെയും ചരിത്രം വിശദീകരിച്ചു നല്കാന് പരിശീലനം ലഭിച്ച ഗൈഡുകളുടെ സേവനം ഇവിടെ ലഭ്യമാണ്. മലയാളം ഉള്പ്പെടെയുള്ള വിവിധ ഭാഷകളില് വിവരങ്ങള് നല്കുന്ന ഡിജിറ്റല് ഗൈഡുകളും ലഭ്യമാണ്. പാതയിലെ പ്രധാന കേന്ദ്രങ്ങളില് ക്യു.ആര് കോഡുകള് സ്ഥാപിച്ചിട്ടുണ്ട്. ഇവ സ്കാന് ചെയ്താല് ആ സ്മാരകത്തിന്റെ ചരിത്രം സ്മാര്ട്ട് ഫോണിലൂടെ അറിയാന് സാധിക്കും.
സന്ദര്ശകര്ക്ക് വിശ്രമിക്കാനായി പരമ്പരാഗത രീതിയില് നിര്മ്മിച്ച തണല് ഇടങ്ങളും കഫേകളും പാതയിലുടനീളം ഒരുക്കിയിട്ടുണ്ട്. പുരാതന അറബിക് കോഫി ആസ്വദിക്കാനുള്ള സൗകര്യവും ഇവിടെയുണ്ട്. തീര്ത്ഥാടകര് പണ്ട് നടന്ന പാതയായതിനാല്, വാഹന തടസ്സമില്ലാതെ നടന്നു കാണാന് പാകത്തില് കല്ലുകള് പാകിയ മനോഹരമായ നടപ്പാതയാണ് സജ്ജീകരിച്ചിരിക്കുന്നത്. ജിദ്ദയിലെ തനത് വിഭവങ്ങള് ലഭിക്കുന്ന നിരവധി ചെറിയ റെസ്റ്റോറന്റുകള് ഈ പാതയിലുണ്ട്.
പഴയ കാലത്തെ കളിപ്പാട്ടങ്ങള്, സുഗന്ധദ്രവ്യങ്ങള്, പരമ്പരാഗത വസ്ത്രങ്ങള് എന്നിവ വാങ്ങാന് കഴിയുന്ന മാര്ക്കറ്റുകള് സന്ദര്ശകര്ക്കായി സജീവമാക്കിയിട്ടുണ്ട്.
ചരിത്രപരമായ പശ്ചാത്തലത്തില് ഫോട്ടോകള് എടുക്കാന് താല്പര്യമുള്ളവര്ക്കായി പ്രത്യേക പോയിന്റുകളും ഇവിടെയുണ്ട്.
ഈ പാത പ്രധാനമായും കാല്നടയാത്രയ്ക്കായി രൂപകല്പ്പന ചെയ്തിട്ടുള്ളതാണ്. അതിനാല് സുഖപ്രദമായ പാദരക്ഷകള് ധരിക്കുന്നത് ഉചിതമായിരിക്കും. സാധാരണയായി വൈകുന്നേരങ്ങളിലാണ് ഇവിടം കൂടുതല് മനോഹരവും സജീവവുമായി കാണപ്പെടാറുള്ളത്.
Related News
