ജിദ്ദ: അടുത്ത ഹജ്ജ് സീസണിനായുള്ള ഒരുക്കങ്ങള് പതിവിലും നേരത്തെ സജീവമാക്കി സൗദി ഹജ്ജ് ഉംറ മന്ത്രാലയം. തീര്ത്ഥാടകര്ക്ക് യാത്രയുടെ എല്ലാ ഘട്ടങ്ങളിലും മികച്ച സേവനം ഉറപ്പാക്കുക എന്ന ലക്ഷ്യത്തോടെ വിപുലമായ പദ്ധതികളാണ് മന്ത്രാലയം നടപ്പിലാക്കുന്നത്. നേരിട്ടുള്ള ഹജ്ജ് രജിസ്ട്രേഷന് പരിപാടിയിലൂടെ ഇതുവരെ 90,000-ത്തിലധികം തീര്ത്ഥാടകര് പേര് രജിസ്റ്റര് ചെയ്തു കഴിഞ്ഞു.
പുണ്യസ്ഥലങ്ങളിലെ സേവനങ്ങളുമായി ബന്ധപ്പെട്ട കരാറുകള് 77 ശതമാനവും പൂര്ത്തിയായി. താമസം, കാറ്ററിംഗ് കരാറുകളുടെ നടപടികള് പുരോഗമിക്കുന്നു. ഹജ്ജ് സീസണില് സേവനമനുഷ്ഠിക്കാന് താല്പ്പര്യമുള്ളവരുടെ രജിസ്ട്രേഷന് പൂര്ത്തിയായിക്കഴിഞ്ഞു. സാമൂഹിക ഉത്തരവാദിത്ത പരിപാടികളിലേക്കുള്ള അപേക്ഷകള് ഇപ്പോഴും സ്വീകരിക്കുന്നുണ്ട്.
തീര്ത്ഥാടകരുടെ അനുഭവം കൂടുതല് ലളിതമാക്കാന് ഡിജിറ്റല് മേഖലയില് വലിയ മാറ്റങ്ങളാണ് വരുത്തിയിരിക്കുന്നത്. വിദേശ തീര്ത്ഥാടകര്ക്ക് സേവനം നല്കുന്ന ഏജന്സികള്ക്കായി പരിഷ്കരിച്ച പുതിയ ഡിജിറ്റല് സംവിധാനം സജ്ജമാക്കി.
സന്ദര്ശനങ്ങളും അനുബന്ധ സേവനങ്ങളും ഏകോപിപ്പിക്കുന്നതിനായി നുസ്ക് മസാര് പ്ലാറ്റ്ഫോമില് 503 ഹോസ്പിറ്റാലിറ്റി സൈറ്റുകള് സജീവമാക്കി. ഹോസ്പിറ്റാലിറ്റി സെന്ററുകളിലെ ജീവനക്കാരുടെ കാര്യക്ഷമത വര്ദ്ധിപ്പിക്കുന്നതിനായി പ്രത്യേക പരിശീലന പരിപാടികള്ക്കും മന്ത്രാലയം തുടക്കം കുറിച്ചിട്ടുണ്ട്.
ഹജ്ജ് നടപടിക്രമങ്ങള് കൂടുതല് വ്യവസ്ഥാപിതമാക്കുകയും, സേവനങ്ങളുടെ ഗുണനിലവാരം ആഗോള നിലവാരത്തിലേക്ക് ഉയര്ത്തുകയും ചെയ്യുക എന്നതാണ് 'എക്സ്' (ത) പ്ലാറ്റ്ഫോമിലൂടെ മന്ത്രാലയം വ്യക്തമാക്കിയത്.
Related News
