ടൊറന്റോ: കാനഡയിലെ ആരോഗ്യ സംവിധാനങ്ങളുടെ മെല്ലെപ്പോക്ക് ഒരു മലയാളി അക്കൗണ്ടന്റിന്റെ ജീവനെടുത്തു. ജോലിസ്ഥലത്ത് വെച്ച് നെഞ്ചുവേദന അനുഭവപ്പെട്ട് എഡ്മന്റണിലെ ഗ്രേ നണ്സ് ഹോസ്പിറ്റലിലെത്തിയ പ്രശാന്ത് ശ്രീകുമാര് (44) ആണ് ചികിത്സ വൈകിയതിനെ തുടര്ന്ന് പിതാവിന്റെയും ഭാര്യയുടെയും കണ്മുന്നില് കുഴഞ്ഞുവീണ് മരിച്ചത്.
തിങ്കളാഴ്ച ഉച്ചയ്ക്ക് ആശുപത്രിയിലെത്തിയ പ്രശാന്തിനെ ഇ.സി.ജി എടുത്ത ശേഷം കുഴപ്പമില്ലെന്ന് പറഞ്ഞ് വെയിറ്റിങ് റൂമിലേക്ക് മാറ്റി. രക്തസമ്മര്ദ്ദം അപകടകരമാംവിധം ഉയര്ന്നിട്ടും വേദനസംഹാരി നല്കി കാത്തിരിക്കാനാണ് അധികൃതര് നിര്ദ്ദേശിച്ചത്. എട്ട് മണിക്കൂര് നീണ്ട കാത്തിരിപ്പിനൊടുവില് ട്രീറ്റ്മെന്റ് റൂമിലെത്തി 10 സെക്കന്ഡിനുള്ളില് ഹൃദയാഘാതം മൂലം പ്രശാന്ത് മരണത്തിന് കീഴടങ്ങി.
'പപ്പാ, എനിക്ക് വേദന സഹിക്കാനാകുന്നില്ല...' എന്ന് മകന് അവസാനമായി പറഞ്ഞ വാക്കുകള് പിതാവ് കുമാര് ശ്രീകുമാര് ഇന്നും വിങ്ങലോടെ ഓര്ക്കുന്നു.
ഈ സംഭവത്തില് കാനഡ സര്ക്കാര് ഉത്തരവാദിത്തം ഏറ്റെടുക്കണമെന്ന് ഇന്ത്യയുടെ വിദേശകാര്യ മന്ത്രാലയം ആവശ്യപ്പെട്ടു. പ്രശാന്തിന്റെ ഭാര്യ നീഹാരിക പങ്കുവെച്ച വിഡിയോ സമൂഹമാധ്യമങ്ങളില് വലിയ പ്രതിഷേധത്തിന് കാരണമായതോടെയാണ് രാജ്യാന്തര തലത്തില് ഈ വിഷയം ശ്രദ്ധിക്കപ്പെട്ടത്. പ്രശാന്ത് - നീഹാരിക ദമ്പതികള്ക്ക് മൂന്ന് മക്കളാണുള്ളത്.
കൃത്യസമയത്ത് വിദഗ്ധ ചികിത്സ ലഭിച്ചിരുന്നെങ്കില് പ്രശാന്തിന്റെ ജീവന് രക്ഷിക്കാമായിരുന്നു എന്ന് ബന്ധുക്കള് പറയുന്നു. വികസിത രാജ്യമായ കാനഡയിലെ ആശുപത്രികളില് അനുഭവപ്പെടുന്ന കടുത്ത തിരക്കും ഡോക്ടര്മാരുടെ ദൗര്ലഭ്യവുമാണ് ഈ ദുരന്തത്തിലൂടെ വീണ്ടും ചര്ച്ചയാകുന്നത്.
Related News
