ന്യൂഡല്‍ഹി: വിദേശരാജ്യങ്ങളില്‍ നിന്ന് നിയമലംഘകരായ ഇന്ത്യക്കാരെ നാടുകടത്തുന്നതില്‍ മുന്നില്‍ സൗദി അറേബ്യയെന്ന് കേന്ദ്ര വിദേശകാര്യ മന്ത്രാലയം. തൊട്ടു പിന്നില്‍ അമേരിക്കയാണ്. 2021 മുതല്‍ 2025 വരെയുള്ള കാലയളവില്‍ പതിനായിരക്കണക്കിന് ഇന്ത്യക്കാരാണ് സൗദിയില്‍ നിന്ന് മാത്രം നാട്ടിലേക്ക് മടങ്ങിയത്. വിസ കാലാവധി കഴിഞ്ഞവരേയും നിയമം ലംഘിച്ചവരെയുമാണ് സൗദി തിരിച്ചയച്ചതെങ്കില്‍ അനധികൃതമായി അതിര്‍ത്തി കടന്നെത്തിയവരെയാണ് യുഎസ് നാടുകടത്തിയത്.

2021 ല്‍ 8,887 ഇന്ത്യക്കാരെയും 2022 ല്‍ 10,277 പേരെയും 2023 ല്‍ 11,486 പേരെയും 2024 ല്‍ 9,206 പേരെയും സൗദിയില്‍നിന്നു നാടു കടത്തി. ഈ വര്‍ഷം ഇതുവരെ 7,019 ഇന്ത്യക്കാരെയാണ് സൗദി തിരിച്ചയച്ചത്. ഇക്കാലയളവില്‍ യുഎസ് തിരിച്ചയച്ച ഇന്ത്യക്കാരുടെ എണ്ണം 2021 ല്‍ 805, 2022 ല്‍ 862, 2023 ല്‍ 617, 2023 ല്‍ 617, 2024 ല്‍ 1,368, 2025 ല്‍ 3,414 എന്നിങ്ങനെയാണെന്ന് വിദേശ മന്ത്രാലയത്തിന്റെ കണക്കുകള്‍ വെളിപ്പെടുത്തുന്നു. 2025-ലേക്ക് എത്തുമ്പോള്‍ അമേരിക്കയില്‍ നിന്നുള്ള നാടുകടത്തലില്‍ വലിയ വര്‍ദ്ധനവാണ് ഉണ്ടായിരിക്കുന്നത്. കഴിഞ്ഞ 5 വര്‍ഷത്തെ കണക്കെടുത്താല്‍ മ്യാന്‍മര്‍ 1591 പേരെയും ബഹ്‌റൈന്‍ 764 പേരെയും മലേഷ്യ 1485 ഇന്ത്യക്കാരെയും പുറത്താക്കിയിട്ടുണ്ട്.