മനാമ: തൊഴില്‍ വിപണിയില്‍ ബഹ്റൈന്‍ പൗരന്മാര്‍ക്ക് മുന്‍ഗണന നല്‍കുക എന്ന ലക്ഷ്യത്തോടെയാണ് വിദേശ തൊഴിലാളികളുടെ വര്‍ക്ക് പെര്‍മിറ്റ് ഫീസ് വര്‍ധിപ്പിക്കാന്‍ കാബിനറ്റ് തീരുമാനിച്ചു. 2026 ജനുവരി മുതല്‍ ഘട്ടം ഘട്ടമായി നടപ്പിലാക്കുന്ന ഈ പദ്ധതി 2029-ഓടെ പൂര്‍ണ്ണമാകും.

നിലവില്‍ 100 ദിനാറായ വര്‍ക്ക് പെര്‍മിറ്റ് ഫീസ് താഴെ പറയുന്ന രീതിയില്‍ ഓരോ വര്‍ഷവും ഉയരും: 2026: 105 ബഹ്റൈന്‍ ദിനാര്‍, 2027: 111 ബഹ്റൈന്‍ ദിനാര്‍, 2028: 118 ബഹ്റൈന്‍ ദിനാര്‍, 2029: 125 ബഹ്റൈന്‍ ദിനാര്‍.

ഏറ്റവും വലിയ വര്‍ധനവ് പ്രവാസികളുടെ വാര്‍ഷിക മെഡിക്കല്‍ ഇന്‍ഷുറന്‍സ് തുകയിലാണ്. നിലവിലെ 72 ദിനാറില്‍ നിന്ന് ഇത് ഇരട്ടിയായി വര്‍ധിക്കും: 2026: 90 ദിനാര്‍, 2027: 108 ദിനാര്‍, 2028: 126 ദിനാര്‍, 2029: 144 ദിനാര്‍.

ഗാര്‍ഹിക തൊഴിലാളികള്‍ ഒഴികെയുള്ള എല്ലാ പ്രവാസി തൊഴിലാളികള്‍ക്കും ഈ ഫീസ് വര്‍ധന ബാധകമായിരിക്കും. ഓരോ മാസവും ലേബര്‍ മാര്‍ക്കറ്റ് റെഗുലേറ്ററി അതോറിറ്റിക്ക് (LMRA) അടയ്ക്കേണ്ട ഫീസിലും ആനുപാതികമായ വര്‍ധനവ് ഉണ്ടാകുമെന്ന് മന്ത്രി അറിയിച്ചു.

വിദേശ തൊഴിലാളികളെ നിയമിക്കുന്നത് ചെലവേറിയതാക്കി മാറ്റുന്നതിലൂടെ തൊഴിലുടമകളെ സ്വദേശികളെ നിയമിക്കാന്‍ പ്രേരിപ്പിക്കുക എന്നതാണ് സര്‍ക്കാരിന്റെ ലക്ഷ്യം. 'സ്വദേശികളുടെ തൊഴിലവസരങ്ങള്‍ ഉറപ്പാക്കാനുള്ള സര്‍ക്കാരിന്റെ പ്രതിബദ്ധതയാണ് ഈ നീക്കത്തിലൂടെ വ്യക്തമാകുന്നത്.' - ബഹ്റൈന്‍തൊഴില്‍നിയമകാര്യ മന്ത്രി പറഞ്ഞു.