ജിദ്ദ: ഇന്ത്യന് കോണ്സുലേറ്റിലെ പുതിയ ഹജ്ജ് കോണ്സലായി സദഫ് ചൗധരി ചുമതലയേറ്റു. ഈ പദവിയിലെത്തുന്ന ആദ്യ വനിതാ ഐ.എഫ്.എസ് ഉദ്യോഗസ്ഥ എന്ന ചരിത്രനേട്ടവുമായാണ് സദഫ് ജിദ്ദയിലെത്തുന്നത്. ഫ്രാന്സിലെ മാഴ്സില്ലേ ഇന്ത്യന് കോണ്സുലേറ്റിലെ ഹെഡ് ഓഫ് ചാന്സലറായി സേവനമനുഷ്ഠിക്കവേയാണ് പുതിയ നിയമനം. ഉത്തരാഖണ്ഡിലെ റൂര്ക്കി സ്വദേശിനിയാണ്.
2020-ലെ യു.പി.എസ്.സി സിവില് സര്വിസ് പരീക്ഷയില് 23-ാം റാങ്കുകാരിയും അന്ന് മുസ്ലിം ഉദ്യോഗാര്ഥികളില് ഏറ്റവും ഉയര്ന്ന റാങ്ക്കാരിയുമായിരുന്നു സദഫ് ചൗധരി. ഗ്രാമീണ ബാങ്ക് ദിയോബന്ദ് ബ്രാഞ്ച് മുന് മാനേജര് ഇസ്റാര് അഹമ്മദിന്റെയും ഷഹബാസ് ബാനുവിന്റെയും മൂത്ത മകളാണ് ഈ 31 കാരി.
ഹജ്ജ് കോണ്സല് എന്ന നിലയില് ഇന്ത്യന് അംബാസഡര്, കോണ്സല് ജനറല് എന്നിവര്ക്കൊപ്പം ചേര്ന്ന് ലക്ഷക്കണക്കിന് വരുന്ന ഇന്ത്യന് തീര്ഥാടകരുടെ ക്ഷേമം, സുരക്ഷ, താമസം തുടങ്ങിയ കാര്യങ്ങള് സദഫ് ഏകോപിപ്പിക്കും. ഹജ്ജ് പ്രവര്ത്തനങ്ങള് സുഗമമാക്കാന് സൗദി അധികൃതരുമായും വിവിധ ഏജന്സികളുമായും ഇവര് ചേര്ന്ന് പ്രവര്ത്തിക്കും.
ഹജ്ജ് വകുപ്പിന് പുറമെ, കൊമേഴ്സ് വകുപ്പിന്റെ ചുമതലയും സദഫ് ചൗധരി വഹിക്കും. കേന്ദ്ര വിദേശകാര്യ മന്ത്രാലയത്തിലേക്ക് സ്ഥലം മാറിപ്പോയ കണ്ണൂര് സ്വദേശി മുഹമ്മദ് അബ്ദുല് ജലീലിന്റെ ഒഴിവിലേക്കാണ് ഈ നിയമനം.
ഇമാം മെഹ്ദി ഹുസൈനും ചുമതലയേറ്റു
സദഫ് ചൗധരിയോടൊപ്പം ഇമാം മെഹ്ദി ഹുസൈനും ജിദ്ദ കോണ്സുലേറ്റില് ചുമതലയേറ്റു. പ്രസ്, ഇന്ഫര്മേഷന്, സാംസ്കാരിക വകുപ്പുകളുടെ ഹെഡ് ഓഫ് ചാന്സറിയായാണ് ഇദ്ദേഹം നിയമിതനായത്. ബിഹാറിലെ ചമ്പാരന് സ്വദേശിയായ ഇദ്ദേഹം നേരത്തെ എത്യോപ്യയിലെ ഇന്ത്യന് എംബസിയില് സേവനമനുഷ്ഠിച്ചിട്ടുണ്ട്.
Related News
