കല്പറ്റ: ഇസ്രായേലില് അഞ്ചു മാസം മുമ്പ് ദുരൂഹ സാഹചര്യത്തില് മരിച്ച നിലയില് കണ്ടെത്തിയ മലയാളി യുവാവിന്റെ ഭാര്യയും മരിച്ചു. സുല്ത്താന് ബത്തേരി കോളിയാടി ചമയംകുന്ന് പുല്ലകുത്ത് ജിനേഷ് സുകുമാരന്റെ ഭാര്യ രേഷ്മ (34) ആണ് മരിച്ചത്. ഭര്ത്താവിന്റെ മരണശേഷം മാനസികമായി തകര്ന്ന നിലയിലായിരുന്ന രേഷ്മ വിഷം ഉള്ളില് ചെന്ന് കോഴിക്കോട് മെഡിക്കല് കോളജ് ആശുപത്രിയില് ചികിത്സയിലിരിക്കെയാണ് മരിച്ചത്. വയനാട് കോളേരി സ്വദേശിനിയാണ് രേഷ്മ.
കഴിഞ്ഞ ജൂലൈയിലാണ് ജിനേഷിനെയും (38) ഇദ്ദേഹം പരിചരിച്ചിരുന്ന 80 വയസ്സുള്ള ഇസ്രായേലി വയോധികയെയും ജറുസലേമിന് സമീപം മേവസേരേട്ട് സിയോനിലെ വീട്ടില് മരിച്ച നിലയില് കണ്ടെത്തിയത്. വയോധിക കുത്തേറ്റ നിലയിലും ജിനേഷ് തൂങ്ങിമരിച്ച നിലയിലുമായിരുന്നു. വയോധികയുടെ ഭര്ത്താവിനെ പരിചരിക്കുന്ന കെയര് ഗിവര് ആയി ജോലി ചെയ്യുകയായിരുന്നു ജിനേഷ്.
ഭര്ത്താവിന്റെ മരണവാര്ത്ത കേട്ടതുമുതല് രേഷ്മ കടുത്ത മാനസിക വിഷമത്തിലായിരുന്നു. ജിനേഷിന്റെ മരണത്തില് ദുരൂഹതയുണ്ടെന്നും മരണകാരണം കണ്ടെത്തണമെന്നും ആവശ്യപ്പെട്ട് എംബസിയിലടക്കം രേഷ്മ നിരവധി തവണ പരാതി നല്കിയിരുന്നു. മരണത്തിലെ നിഗൂഢതകള് പുറത്തുകൊണ്ടുവരാന് ഇസ്രായേലിലെ മലയാളി സുഹൃത്തുക്കളെയും അധികൃതരെയും ഇവര് നിരന്തരം ബന്ധപ്പെട്ടിരുന്നു. അന്വേഷണ പുരോഗതിയെക്കുറിച്ചുള്ള വിവരങ്ങളൊന്നും ലഭ്യമാകാത്തതിലുള്ള നിരാശയിലായിരുന്നു കുടുംബം.
വയനാട്ടില് മെഡിക്കല് റെപ്രസന്റേറ്റീവായി ജോലി ചെയ്യുന്നതിനിടെയാണ് ജിനേഷ് ഇസ്രായേലിലേക്ക് പോയത്. ബത്തേരി കൈവട്ടമൂല പെലക്കുത്ത് വീട്ടില് രാധയുടെയും പരേതനായ സുകുമാരന്റെയും മകനാണ് ജിനേഷ്. ഏക മകള്: ആരാധ്യ (തംബുരു).
Related News
