കിരിബാത്തി: ലോകം പുതുവര്‍ഷത്തെ വരവേല്‍ക്കാന്‍ ഒരുങ്ങവെ, 2026-ലേക്ക് ആദ്യം ചുവടുവെച്ച് പസഫിക് ദ്വീപുരാഷ്ട്രമായ കിരിബാത്തി. ഇന്ത്യന്‍ സമയം ബുധനാഴ്ച വൈകുന്നേരം 3:30-ഓടെയാണ് കിരിബാത്തിയില്‍ പുതുവര്‍ഷം പിറന്നത്. അന്താരാഷ്ട്ര ദിനാങ്കരേഖയോട് (International Date Line) ചേര്‍ന്നുനില്‍ക്കുന്ന ഭൂമിശാസ്ത്രപരമായ പ്രത്യേകതയാണ് കിരിബാത്തിയുടെ പുതുവര്‍ഷാഘോഷങ്ങളെ ലോകത്ത് തന്നെ ആദ്യത്തേതാക്കുന്നത്.

പസഫിക് സമുദ്രത്തിന്റെ മധ്യഭാഗത്തായി സ്ഥിതി ചെയ്യുന്ന ഈ രാജ്യം, സമയക്രമത്തിലെ പ്രത്യേകത മൂലം ഭൂമിയില്‍ പുതിയ വര്‍ഷം ആദ്യം പിറക്കുന്ന ഇടമായി വീണ്ടും മാറി. ലോകത്തിന്റെ മറ്റു ഭാഗങ്ങള്‍ ഡിസംബര്‍ 31-ന്റെ തിരക്കുകളിലായിരിക്കുമ്പോഴാണ് കിരിബാത്തി പുതുവര്‍ഷത്തിലേക്ക് പ്രവേശിച്ചത്.

വര്‍ണ്ണാഭമായ വെടിക്കെട്ടുകളോടെയും ആഹ്ലാദപ്രകടനങ്ങളോടെയുമാണ് കിരിബാത്തി ജനത 2026-നെ വരവേറ്റത്. ദ്വീപിന്റെ ആകാശത്ത് പടക്കം പൊട്ടുന്നതിന്റെയും ആഘോഷങ്ങളുടെയും ദൃശ്യങ്ങള്‍ സമൂഹമാധ്യമങ്ങളില്‍ ഇതിനോടകം തരംഗമായിക്കഴിഞ്ഞു. കിരിബാത്തിക്ക് തൊട്ടുപിന്നാലെ ടോംഗ, സമോവ ദ്വീപുകളിലും പുതുവര്‍ഷം പിറന്നു.

ഓരോ വര്‍ഷവും ഭൂമിയില്‍ കലണ്ടര്‍ മാറുന്നത് കിരിബാത്തിയില്‍ നിന്നാണ് തുടങ്ങുന്നത്. പല രാജ്യങ്ങളും 2025-ലെ അവസാന ദിനത്തിലേക്ക് ഉണരുന്നതേ ഉണ്ടായിരുന്നുള്ളൂ എങ്കിലും, കിരിബാത്തിയില്‍ ഇതിനോടകം ആഘോഷരാവുകള്‍ പുലര്‍ന്നു കഴിഞ്ഞു. വരും മണിക്കൂറുകളില്‍ ന്യൂസിലന്‍ഡ്, ഓസ്ട്രേലിയ തുടങ്ങിയ രാജ്യങ്ങളും പുതുവര്‍ഷത്തിലേക്ക് പ്രവേശിക്കും.