റിയാദ്: പുതുവര്‍ഷത്തിന്റെ തുടക്കത്തില്‍ രാജ്യത്ത് ഇന്ധന, പാചകവാതക നിരക്കുകള്‍ വര്‍ധിപ്പിച്ച് സൗദി അറേബ്യ. ദേശീയ എണ്ണ കമ്പനിയായ സൗദി അരാംകോ ഡീസല്‍ വിലയില്‍ 7.8 ശതമാനം വര്‍ധനവാണ് പ്രഖ്യാപിച്ചത്. ഇതോടൊപ്പം രാജ്യത്തുടനീളം പാചകവാതക സിലിണ്ടറുകളുടെ വില ഏകീകരിക്കാന്‍ നാഷനല്‍ ഗ്യാസ് ആന്‍ഡ് ഇന്‍ഡസ്ട്രിയലൈസേഷന്‍ കമ്പനിയും (ഗാസ്‌കോ) തീരുമാനിച്ചു. ജനുവരി ഒന്ന് മുതല്‍ പുതിയ നിരക്കുകള്‍ പ്രാബല്യത്തില്‍ വന്നു.

പുതുക്കിയ നിരക്ക് പ്രകാരം ഡീസല്‍ ലിറ്ററിന് 1.79 റിയാല്‍ ആയി ഉയര്‍ന്നു. 2022 മുതല്‍ വര്‍ഷാരംഭത്തില്‍ ഡീസല്‍ വില പുനഃപരിശോധിക്കുന്നതിന്റെ ഭാഗമായുള്ള അഞ്ചാമത്തെ വില വര്‍ധനവാണിത്. 2015-ല്‍ വെറും 0.25 റിയാലായിരുന്ന ഡീസല്‍ വില പത്തുവര്‍ഷത്തിനിടെ ഘട്ടംഘട്ടമായാണ് നിലവിലെ നിരക്കിലെത്തിയത്. പെട്രോള്‍ വിലയില്‍ മാറ്റമില്ല.


രാജ്യത്തെ എല്ലാ മേഖലകളിലും ഒരേ നിരക്കില്‍ പാചകവാതകം ലഭ്യമാക്കുന്നതിന്റെ ഭാഗമായാണ് ഗാസ്‌കോ പുതിയ നിരക്കുകള്‍ പുറത്തിറക്കിയത്. ഗതാഗതച്ചെലവും മൂല്യവര്‍ധിത നികുതിയും (VAT) ഉള്‍പ്പെടെയുള്ള പുതിയ നിരക്കു പ്രകാരം 11 കിലോഗ്രാം സിലിണ്ടറിന് 26.23 റിയാലും 5 കിലോഗ്രാം സിലിണ്ടറിന് 11.93 റിയാല്‍ലും കേന്ദ്ര ഗ്യാസ് ടാങ്കുകള്‍ക്ക് 1.1770 റിയാലുമാണ് (ഒരു ലിറ്ററിന്) വില.

ഗതാഗത മേഖലയിലും വ്യവസായ മേഖലയിലും ഡീസല്‍ വില വര്‍ധനവ് ചെറിയ രീതിയിലുള്ള ചലനങ്ങള്‍ ഉണ്ടാക്കിയേക്കാം. എന്നാല്‍ പാചകവാതക വില ഏകീകരിച്ചത് വിവിധ പ്രവിശ്യകളിലുള്ള ഉപഭോക്താക്കള്‍ക്ക് ഒരേ നിരക്കില്‍ സേവനം ഉറപ്പാക്കാന്‍ സഹായിക്കും.