അബൂദാബി: യുഎഇയിലെ സിവില് ഇടപാടുകള് സംബന്ധിച്ച നിയമങ്ങളില് ഭരണകൂടം ചരിത്രപരമായ ഭേദഗതികള് വരുത്തി. പ്രായപൂര്ത്തിയാകുന്നതിനുള്ള പ്രായപരിധി കുറച്ചതും സാമ്പത്തിക കൈകാര്യാവകാശങ്ങളില് ഇളവ് നല്കിയതുമാണ് പുതിയ നിയമത്തിലെ ഏറ്റവും ശ്രദ്ധേയമായ മാറ്റങ്ങള്.
മുന്പ് 21 ചാന്ദ്ര വര്ഷമായിരുന്നു (ഹിജ്റ വര്ഷം) പ്രായപൂര്ത്തിയാകാനുള്ള പ്രായം. അത് ഇപ്പോള് 18 ഗ്രിഗോറിയന് (ഇംഗ്ലീഷ്) വര്ഷമായി നിശ്ചയിച്ചു. ഇതോടെ 18 വയസ്സ് തികയുന്നവര്ക്ക് നിയമപരമായി സിവില് ഇടപാടുകളില് ഏര്പ്പെടാം. 18 വയസ്സുള്ളവര്ക്ക് തങ്ങളുടെ ആസ്തികളും സാമ്പത്തിക കാര്യങ്ങളും സ്വന്തമായി കൈകാര്യം ചെയ്യാന് അനുവാദമുണ്ടാകും.
പ്രത്യേക വ്യവസ്ഥകള്ക്ക് വിധേയമായി, 15 വയസ്സ് തികഞ്ഞവര്ക്ക് തങ്ങളുടെ സ്വത്ത് കൈകാര്യം ചെയ്യാനുള്ള അനുമതിക്കായി അപേക്ഷിക്കാനുള്ള അവസരവും പുതിയ നിയമം നല്കുന്നുണ്ട്.
യുവാക്കളെ ശാക്തീകരിക്കുകയും രാജ്യത്ത് സംരംഭകത്വം പ്രോത്സാഹിപ്പിക്കുകയും ചെയ്യുക എന്നതാണ് ഈ പരിഷ്കാരത്തിന്റെ പ്രധാന ലക്ഷ്യം. പുതിയ നിയമം കരാറുകള്, ഇന്ഷുറന്സ്, പ്രൊഫഷണല് പ്രവര്ത്തനങ്ങള് എന്നിവയില് കൂടുതല് വ്യക്തത ഉറപ്പാക്കുന്നു. ലാഭേച്ഛയില്ലാതെ പ്രവര്ത്തിക്കുന്ന കമ്പനികള്ക്കായി പുതിയ നിയമ ചട്ടക്കൂടും ഇതില് ഉള്പ്പെടുത്തിയിട്ടുണ്ട്.
മരണമോ പരിക്കോ സംഭവിക്കുന്ന കേസുകളില് ദിയാധനവും മറ്റ് അധിക നഷ്ടപരിഹാരങ്ങളും സംയോജിപ്പിക്കാന് കോടതികള്ക്ക് അനുമതി നല്കുന്നു. മുന്പുണ്ടായിരുന്ന നിയമപരമായ അവ്യക്തതകള് നീക്കി, ഇരകള്ക്ക് അര്ഹമായ പൂര്ണ്ണ സംരക്ഷണം ഉറപ്പാക്കാന് ഇത് സഹായിക്കും. ആധുനിക കാലത്തെ സാമ്പത്തിക-സാമൂഹിക സാഹചര്യങ്ങളുമായി സിവില് നിയമങ്ങളെ യോജിപ്പിക്കുക വഴി നിക്ഷേപകര്ക്കും യുവാക്കള്ക്കും കൂടുതല് സുരക്ഷിതമായ അന്തരീക്ഷം ഒരുക്കുകയാണ് യുഎഇ ലക്ഷ്യമിടുന്നത്.
Related News
