റിയാദ്: ആഗോള ഡിജിറ്റല് ഭൂപടത്തില് വിപ്ലവാത്മകമായ മുന്നേറ്റവുമായി സൗദി അറേബ്യ. ലോകത്തിലെ ഏറ്റവും വലിയ സര്ക്കാര് ഡാറ്റാ സെന്ററായ 'ഹെക്സഗണ്' (Hexagon) റിയാദിന് സമീപം സല്ബൂകില് നിര്മ്മാണം ആരംഭിച്ചു. സൗദി ഡാറ്റ ആന്ഡ് ആര്ട്ടിഫിഷ്യല് ഇന്റലിജന്സ് അതോറിറ്റിയുടെ കീഴിലാണ് ഈ വമ്പന് പദ്ധതി യാഥാര്ത്ഥ്യമാകുന്നത്.
മൂന്ന് കോടി ചതുരശ്ര അടിയിലധികം വിസ്തൃതിയിലാണ് നിര്മാണം. 480 മെഗാവാട്ട് (ലോകത്തിലെ ഏറ്റവും വലിയ സര്ക്കാര് ഡാറ്റാ സെന്റര്) ആണ് ശേഷി. ആര്ട്ടിഫിഷ്യല് ഇന്റലിജന്സ് സാങ്കേതികവിദ്യകള്ക്ക് കരുത്തേകുകയും ദേശീയ ഡിജിറ്റല് സേവനങ്ങളുടെ കാര്യക്ഷമത വര്ദ്ധിപ്പിക്കുകയുമാണ് ലക്ഷ്യം.
കിരീടാവകാശി അമീര് മുഹമ്മദ് ബിന് സല്മാന്റെ നേരിട്ടുള്ള പിന്തുണയോടെയാണ് ഈ പദ്ധതി നടപ്പിലാക്കുന്നത്. ഹെക്സഗണ് പരമ്പരയിലെ ആദ്യ കേന്ദ്രമാണിത്. വരും കാലങ്ങളില് രാജ്യത്തിന്റെ വിവിധ ഭാഗങ്ങളില് സമാനമായ കൂടുതല് കേന്ദ്രങ്ങള് സ്ഥാപിക്കാനാണ് സദായാ ലക്ഷ്യമിടുന്നത്.
ഉയര്ന്ന സുരക്ഷയും വിശ്വാസ്യതയും ഉറപ്പാക്കാന് 'ഡ്യുവല്-മോഡ് ഓപ്പറേറ്റിങ് ആര്ക്കിടെക്ചര്' എന്ന നൂതന സാങ്കേതികവിദ്യയാണ് ഇവിടെ ഉപയോഗിക്കുന്നത്. ഇത് ഗവണ്മെന്റ് ഡാറ്റകള്ക്ക് ഏറ്റവും മികച്ച പ്രവര്ത്തനക്ഷമത ഉറപ്പുനല്കുന്നു.
സല്ബൂകില് നടന്ന തറക്കല്ലിടല് ചടങ്ങില് ആഭ്യന്തര സഹമന്ത്രി അമീര് ഡോ. ബന്ദര് ബിന് അബ്ദുള്ള അല്മശാരി, അമീര് ഫഹദ് ബിന് ഖാലിദ് ബിന് ഫൈസല്, ഐടി മന്ത്രി എന്ജി. അബ്ദുള്ള ബിന് അമര് അല്സ്വാഹ എന്നിവരടക്കം നിരവധി പ്രമുഖര് പങ്കെടുത്തു. സദായാ പ്രസിഡന്റ് ഡോ. അബ്ദുള്ള ബിന് ശറഫ് അല്ഗാംദി അതിഥികളെ സ്വീകരിച്ചു.
'ദേശീയ ഡിജിറ്റല് പരിവര്ത്തനത്തില് ഈ ഡാറ്റാ സെന്റര് ഒരു നാഴികക്കല്ലാകും. ആര്ട്ടിഫിഷ്യല് ഇന്റലിജന്സ് മേഖലയില് സൗദിയെ ആഗോള കേന്ദ്രമാക്കി മാറ്റുകയാണ് ഞങ്ങളുടെ ലക്ഷ്യം.' - ഡോ. അബ്ദുള്ള ബിന് ശറഫ് അല്ഗാംദി പറഞ്ഞു.
Related News
