റിയാദ്: സൗദി അറേബ്യയുടെ സാമ്പത്തിക വികസനത്തില് പ്രാദേശിക നിക്ഷേപകര്ക്കാണ് മന്ത്രാലയം പ്രഥമ പരിഗണന നല്കുന്നതെന്ന് നിക്ഷേപ മന്ത്രി ഖാലിദ് അല്-ഫാലിഹ് വ്യക്തമാക്കി. ശൂറ കൗണ്സില് സെഷനില് സംസാരിക്കുകയായിരുന്നു അദ്ദേഹം. വിദേശ നിക്ഷേപങ്ങള് ആകര്ഷിക്കുമ്പോള് തന്നെ പ്രാദേശിക നിക്ഷേപകര്ക്ക് തുല്യമായ മത്സരസാധ്യതകളും സൗകര്യങ്ങളും ഉറപ്പാക്കുന്നതിനെക്കുറിച്ച് ശൂറ കൗണ്സില് അംഗം ഹനാന് അല്-സമാരി ഉന്നയിച്ച ചോദ്യത്തിന് മറുപടി നല്കുകയായിരുന്നു മന്ത്രി.
മന്ത്രാലയത്തിന്റെ കഴിഞ്ഞ കാലത്തെ നേട്ടങ്ങളും 'വിഷന് 2030' ലക്ഷ്യമിട്ടുള്ള ഭാവി പദ്ധതികളും മന്ത്രി വിശദീകരിച്ചു. രാജ്യത്തിന്റെ സമ്പദ്വ്യവസ്ഥയെ എണ്ണ ഇതര വരുമാനത്തിലേക്ക് വൈവിധ്യവത്കരിക്കുന്നതില് സ്വകാര്യ മേഖലയുടെ പങ്കും അദ്ദേഹം ഊന്നിപ്പറഞ്ഞു.
മന്ത്രാലയം ഇതുവരെ ഒരു ട്രില്യണ് റിയാലിലധികം മൂല്യം വരുന്ന രണ്ടായിരത്തിലധികം നിക്ഷേപ അവസരങ്ങള് കണ്ടെത്തിയിട്ടുണ്ട്. 'ഇന്വെസ്റ്റ് ഇന് സൗദി അറേബ്യ' പ്ലാറ്റ്ഫോം വഴി ഇതുവരെ 231 ബില്യണ് റിയാലിലധികം മൂല്യമുള്ള 346 നിക്ഷേപ കരാറുകള് വിജയകരമായി പൂര്ത്തിയാക്കി.
2021-ല് കിരീടാവകാശി പ്രഖ്യാപിച്ച 'നാഷണല് ഇന്വെസ്റ്റ്മെന്റ് സ്ട്രാറ്റജി' രാജ്യത്തെ നിക്ഷേപ മേഖലയില് വലിയ മാറ്റങ്ങള് കൊണ്ടുവന്നതായും മന്ത്രി ചൂണ്ടിക്കാട്ടി. നിക്ഷേപ മന്ത്രാലയം, സൗദി ഇന്വെസ്റ്റ്മെന്റ് മാര്ക്കറ്റിംഗ് അതോറിറ്റി എന്നിവയുടെ സ്ഥാപനവും 'ഷരീക്' പ്രോഗ്രാമും സ്വകാര്യ മേഖലയെ ശാക്തീകരിക്കുന്നതില് നിര്ണ്ണായക പങ്ക് വഹിച്ചതായി അല്-ഫാലിഹ് പറഞ്ഞു. ശൂറ കൗണ്സിലും മന്ത്രാലയവും തമ്മിലുള്ള സഹകരണം രാജ്യത്തിന്റെ പുരോഗതിക്കും പൗരന്മാരുടെ താല്പര്യങ്ങള് സംരക്ഷിക്കുന്നതിനും അത്യന്താപേക്ഷിതമാണെന്നും അദ്ദേഹം കൂട്ടിച്ചേര്ത്തു.
പ്രാദേശിക നിക്ഷേപകരുടെ മത്സരക്ഷമത വര്ദ്ധിപ്പിക്കുന്നതിനും നിക്ഷേപ പ്രക്രിയകള് കൂടുതല് കാര്യക്ഷമമാക്കുന്നതിനുമുള്ള പ്രവര്ത്തനങ്ങള് മന്ത്രാലയം തുടരുമെന്ന് അദ്ദേഹം ഉറപ്പുനല്കി.
Related News
