ബംഗളൂരു- ബംഗളൂരുവിലെ 45 ലക്ഷം രൂപയുടെ വാര്‍ഷിക ശമ്പളം, ലണ്ടനിലെ 1.15 കോടി രൂപയുടെ (108k Pounds) പാക്കേജിനേക്കാള്‍ മികച്ച ജീവിതസാഹചര്യം നല്‍കുമെന്ന് ഗൂഗിള്‍ ജീവനക്കാരനായ വൈഭവ് അഗര്‍വാള്‍. പര്‍ച്ചേസിംഗ് പവര്‍ പാരിറ്റി എന്ന സാമ്പത്തിക തത്വം വിശദീകരിച്ചുകൊണ്ടാണ് അദ്ദേഹം തന്റെ വാദം ലിങ്ക്ഡ്ഇന്നില്‍ പങ്കുവെച്ചത്.

വൈഭവിന്റെ കണക്കുകൂട്ടല്‍ പ്രകാരം 45 ലക്ഷം രൂപ ശമ്പളമുള്ള ഒരാള്‍ക്ക് മാസം ഏകദേശം 2.7 ലക്ഷം രൂപ കയ്യില്‍ കിട്ടും. 50,000 രൂപയ്ക്ക് മികച്ച ഒരു ലക്ഷ്വറി അപ്പാര്‍ട്ട്‌മെന്റ് ലഭിക്കും. 5,000 രൂപയ്ക്ക് പാചകക്കാരനെയും 3,000 രൂപയ്ക്ക് വീട്ടുജോലിക്കാരെയും ലഭിക്കും. യാത്രയ്ക്ക് ഊബര്‍ , സാധനങ്ങള്‍ വാങ്ങാന്‍ ബ്ലിങ്കിറ്റ് പോലുള്ള ആപ്പുകള്‍ എന്നിവ ഉപയോഗിക്കാം. ഇതെല്ലാം കഴിഞ്ഞ് വലിയൊരു തുക സമ്പാദ്യമായി മാറ്റാം.

ലണ്ടനിലെ ജീവിതം: ലണ്ടനില്‍ 1.15 കോടി രൂപ ശമ്പളമുണ്ടെങ്കിലും നികുതിയും ഇന്‍ഷുറന്‍സും കഴിഞ്ഞ് മാസം ഏകദേശം 6.1 ലക്ഷം രൂപയേ (6,100 പൗണ്ട്) ലഭിക്കൂ.

ലണ്ടന്‍ നഗരത്തിന് പുറത്ത് ഒരു വണ്‍ ബെഡ്റൂം ഫ്‌ളാറ്റിന് പോലും മാസം 2.4 ലക്ഷം രൂപ (2,200 പൗണ്ട്) വാടക നല്‍കണം.

സ്വന്തമായി ഭക്ഷണം പാകം ചെയ്യണം, ടോയ്ലറ്റും പാത്രങ്ങളും സ്വയം വൃത്തിയാക്കണം. അവിടെ വീട്ടുജോലിക്കാരെ നിര്‍ത്തുക എന്നത് അതിസമ്പന്നര്‍ക്ക് മാത്രം സാധിക്കുന്ന കാര്യമാണ്. പൊതുഗതാഗതത്തെ ആശ്രയിക്കേണ്ടി വരും.

വൈഭവിന്റെ നിഗമനം: ആഡംബരവും സൗകര്യങ്ങളുമാണ് ലക്ഷ്യമെങ്കില്‍ ബംഗളൂരുവാണ് നല്ലത്. എന്നാല്‍ അന്താരാഷ്ട്ര തലത്തിലുള്ള തൊഴില്‍ പരിചയം, ശുദ്ധവായു, മൂല്യമുള്ള കറന്‍സി എന്നിവയാണ് വേണ്ടതെങ്കില്‍ ലണ്ടന്‍ തിരഞ്ഞെടുക്കാം. 'പൗണ്ടിനെ രൂപയിലേക്ക് മാറ്റരുത്, ജീവിതശൈലിയെ ജീവിതശൈലിയുമായി താരതമ്യം ചെയ്യൂ' എന്നാണ് അദ്ദേഹം പറയുന്നത്.

വൈഭവിന്റെ പോസ്റ്റിന് താഴെ അനുകൂലിച്ചും പ്രതികൂലിച്ചും നിരവധി പേര്‍ എത്തി.

'സ്വയം വീട് വൃത്തിയാക്കുന്നതും ഭക്ഷണം പാകം ചെയ്യുന്നതും എങ്ങനെയാണ് കഷ്ടപ്പാടാവുന്നത്? ഇന്ത്യയിലെ കുറഞ്ഞ വേതനത്തില്‍ ജോലി ചെയ്യുന്ന തൊഴിലാളികളെ ചൂഷണം ചെയ്യുന്നതാണോ നിങ്ങളുടെ ആഡംബരം? ലണ്ടനിലെ മികച്ച റോഡുകളെയും നടപ്പാതകളെയും കുറിച്ച് നിങ്ങള്‍ പറയുന്നില്ല.' - ഒരു ഉപയോക്താവ് കുറിച്ചു.

'45 ലക്ഷം രൂപ കിട്ടുന്ന ഒരാള്‍ക്ക് ബംഗളൂരുവില്‍ മാന്യമായി ജീവിക്കാം. ലണ്ടനില്‍ വാടക മാത്രം ശമ്പളത്തിന്റെ 40% കൊണ്ടുപോകും. കൈവശം ബാക്കി വരുന്ന തുകയാണ് പ്രധാനം, അല്ലാതെ ശമ്പളത്തിന്റെ വലിപ്പമല്ല.' - മറ്റൊരാള്‍ അഭിപ്രായപ്പെട്ടു.

ഇന്ത്യയില്‍ 45 ലക്ഷം രൂപ ശമ്പളം ലഭിക്കുന്നത് ബ്രിട്ടനില്‍ ഒരു ശരാശരി സോഫ്റ്റ്വെയര്‍ എഞ്ചിനീയര്‍ക്ക് ലഭിക്കുന്ന ശമ്പളത്തേക്കാള്‍ പ്രയാസകരമായ കാര്യമാണെന്നും ചിലര്‍ ചൂണ്ടിക്കാട്ടി.