റിയാദ്: 2025ലെ ഏറ്റവും സ്വാധീനമുള്ള അറബ് നേതാവായി സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് തെരഞ്ഞെടുക്കപ്പെട്ടു. പ്രമുഖ വാര്ത്താ മാധ്യമമായ ആര്.ടി അറബിക് നടത്തിയ അന്താരാഷ്ട്ര അഭിപ്രായ സര്വേയില് 68.88 ശതമാനം വോട്ടുകള് നേടിയാണ് അദ്ദേഹം ഒന്നാം സ്ഥാനം നിലനിര്ത്തിയത്. തുടര്ച്ചയായ വര്ഷങ്ങളില് ഈ പദവി നിലനിര്ത്തുന്നതിലൂടെ അറബ് രാഷ്ട്രീയത്തിലെ തന്റെ അനിഷേധ്യ സ്വാധീനം അദ്ദേഹം ഒരിക്കല് കൂടി തെളിയിച്ചിരിക്കുകയാണ്.
സര്വേയില് 26.84 ശതമാനം വോട്ടുകളുമായി ജോര്ദാന് രാജാവ് അബ്ദുള്ള രണ്ടാമന് രണ്ടാം സ്ഥാനത്തെത്തി. ബഷാര് അല് അസദിന്റെ വീഴ്ചയ്ക്ക് ശേഷം സിറിയയുടെ പുതിയ നേതാവായി ഉയര്ന്നുവന്ന അഹമ്മദ് അല് ഷറ മൂന്നാം സ്ഥാനവും, മൊറോക്കോ രാജാവ് മുഹമ്മദ് ആറാമന് നാലാം സ്ഥാനവും കരസ്ഥമാക്കി.
തുടര്ച്ചയായ വര്ഷങ്ങളിലും ഈ പദവി നിലനിര്ത്താന് കഴിഞ്ഞത് അറബ് ലോകത്തും അന്താരാഷ്ട്ര തലത്തിലും മുഹമ്മദ് ബിന് സല്മാന് എന്ന നേതാവിനുള്ള സ്വീകാര്യതയുടെ തെളിവായി വിലയിരുത്തപ്പെടുന്നു. സൗദി അറേബ്യയുടെ സാമ്പത്തിക-സാമൂഹിക പരിഷ്കരണ പദ്ധതിയായ 'വിഷന് 2030' ആണ് അദ്ദേഹത്തിന്റെ ജനപ്രീതിക്ക് പ്രധാന കാരണം. സൗദി അറേബ്യയെ ലോകത്തിന്റെ നെറുകയില് എത്തിക്കുന്നതില് മുഹമ്മദ് ബിന് സല്മാന് നടത്തുന്ന വിപ്ലവകരമായ മാറ്റങ്ങള്ക്കുള്ള അംഗീകാരമായാണ് ഈ സര്വേ ഫലത്തെ അറബ് മാധ്യമങ്ങള് വിശേഷിപ്പിക്കുന്നത്.
Related News
