മസ്കത്ത്: ഒമാനിലെ ബിദ്ബിദില് റെസിഡന്ഷ്യല് കോംപ്ലക്സിന് നേരെ അക്രമം നടത്തിയ സംഭവത്തില് 59 പ്രവാസികളെ നാടുകടത്താന് കോടതി വിധിച്ചു. നിയമവിരുദ്ധമായി സംഘം ചേരല്, പൊതുമുതല് നശിപ്പിക്കല്, ക്രമസമാധാന ലംഘനം എന്നീ കുറ്റങ്ങള് ചുമത്തിയാണ് ഫസ്റ്റ് ഇന്സ്റ്റന്സ് കോടതിയുടെ വിധി. പ്രതികള്ക്ക് മൂന്ന് മാസം മുതല് ഒരു വര്ഷം വരെ തടവുശിക്ഷയും വിധിച്ചിട്ടുണ്ട്.
കഴിഞ്ഞ ഡിസംബര് 25-നായിരുന്നു കേസിനാസ്പദമായ സംഭവം. ഒരു കമ്പനിയുടെ റെസിഡന്ഷ്യല് കോംപ്ലക്സ് പരിസരത്ത് ഒത്തുകൂടിയ സംഘം വാഹനങ്ങളും ടെന്റുകളും തകര്ക്കുകയും സംഘര്ഷത്തിന് പ്രേരിപ്പിക്കുകയും ചെയ്തു. പിരിഞ്ഞുപോകാനുള്ള പൊലീസിന്റെ കര്ശന നിര്ദ്ദേശം അവഗണിക്കുകയും അക്രമം തുടരുകയും ചെയ്തതോടെയാണ് റോയല് ഒമാന് പൊലീസ് പ്രതികളെ കസ്റ്റഡിയിലെടുത്തത്.
പ്രതികളുടെ പക്കല് നിന്ന് കണ്ടെടുത്ത മൊബൈല് ഫോണുകള് കണ്ടുകെട്ടാനും ശിക്ഷാ കാലാവധി പൂര്ത്തിയാകുന്ന മുറയ്ക്ക് ഇവരെ രാജ്യത്ത് നിന്ന് പുറത്താക്കാനും പബ്ലിക് പ്രൊസിക്യൂഷന് പ്രസ്താവനയില് അറിയിച്ചു. രാജ്യത്തെ നിയമവാഴ്ച ലംഘിക്കുന്നവര്ക്കെതിരെ കര്ശന നടപടി തുടരുമെന്ന ശക്തമായ മുന്നറിയിപ്പാണ് ഈ വിധിയിലൂടെ അധികൃതര് നല്കുന്നത്.
Related News
