റിയാദ്: സൗദി അറേബ്യയില് ശൈത്യകാലം അതിന്റെ ഏറ്റവും തീവ്രമായ ഘട്ടത്തിലേക്ക് കടക്കുന്നു. ശൈത്യത്തിന്റെ ഒന്നാം ഘട്ടമായ 'മുറബ്ബാനിയ്യ' ഇന്ന് അവസാനിക്കുന്നതോടെ, നാളെ മുതല് 'അല് ശബത്ത്' സീസണ് ആരംഭിക്കുമെന്ന് പ്രശസ്ത കാലാവസ്ഥാ നിരീക്ഷകന് ഖാലിദ് അല് സആക് അറിയിച്ചു. ഇതോടെ വരും ദിവസങ്ങളില് രാജ്യത്ത് തണുപ്പിന് കടുപ്പമേറുമെന്നാണ് റിപ്പോര്ട്ടുകള്.
26 ദിവസം നീളുന്ന സീസണ് അറേബ്യന് ശൈത്യകാലത്തെ ഏറ്റവും തണുപ്പേറിയ സമയമായാണ് 26 ദിവസം നീണ്ടുനില്ക്കുന്ന 'അല് ശബത്ത്' അറിയപ്പെടുന്നത്. ഈ കാലയളവില് അസ്ഥി തുളയ്ക്കുന്ന തണുത്ത കാറ്റും താപനിലയിലെ വന് ഇടിവും പ്രതീക്ഷിക്കാം. വീടിനകത്തും പുറത്തും ഒരുപോലെ തണുപ്പ് അനുഭവപ്പെടുന്ന ശൈത്യമാണ് ഇതിന്റെ പ്രത്യേകത.
രാജ്യത്തിന്റെ വടക്കന് അതിര്ത്തി പ്രദേശങ്ങളിലും കിഴക്കന് പ്രവിശ്യയുടെ വിവിധ ഭാഗങ്ങളിലും മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു. മദീന, മക്ക, അല്ബഹ, അസീര് എന്നീ പ്രവിശ്യകളില് നേരിയ മഴയ്ക്കൊപ്പം കനത്ത മൂടല്മഞ്ഞും അനുഭവപ്പെട്ടേക്കാം. മൂടല്മഞ്ഞ് കാഴ്ചപരിധി കുറയ്ക്കാന് സാധ്യതയുള്ളതിനാല് വാഹനമോടിക്കുന്നവര് ജാഗ്രത പാലിക്കണമെന്ന് അധികൃതര് നിര്ദ്ദേശിച്ചു.
മദീന, തബൂക്ക്, അല്ജൗഫ്, വടക്കന് പ്രവിശ്യ, ഹാഇല്, ഖസീം, റിയാദ് എന്നിവിടങ്ങളില് ശക്തമായ പൊടിക്കാറ്റിന് സാധ്യതയുണ്ട്. അന്തരീക്ഷം മേഘാവൃതമായിരിക്കുമെങ്കിലും കാറ്റിന്റെ വേഗത കൂടുന്നത് ജനജീവിതത്തെ ബാധിച്ചേക്കാം. ശ്വാസകോശ സംബന്ധമായ അസുഖമുള്ളവര് മാസ്ക് ധരിക്കണമെന്നും പുറത്തിറങ്ങുമ്പോള് കരുതലുണ്ടാകണമെന്നും ആരോഗ്യ വിഭാഗം മുന്നറിയിപ്പ് നല്കി.
ശൈത്യം കടുക്കുന്ന സാഹചര്യത്തില് ഹീറ്ററുകള് ഉപയോഗിക്കുന്നവര് സുരക്ഷാ മാനദണ്ഡങ്ങള് പാലിക്കണമെന്നും സിവില് ഡിഫന്സ് നിര്ദ്ദേശിച്ചിട്ടുണ്ട്.
Related News
