മദീന: മദീനയിലെ പ്രവാചക പള്ളി (മസ്ജിദുന്നബവി) ആധുനിക സാങ്കേതികവിദ്യയുടെ സഹായത്തോടെ നടപ്പിലാക്കുന്ന വിദൂര പഠന സംവിധാനം ആഗോളതലത്തില്‍ ശ്രദ്ധേയമാകുന്നു. 2025-ല്‍ മാത്രം ലോകത്തിന്റെ വിവിധ ഭാഗങ്ങളില്‍ നിന്നായി ഒമ്പതര ലക്ഷത്തോളം (9.4 ലക്ഷം) വിദ്യാര്‍ത്ഥികളാണ് ഈ സംവിധാനത്തിലൂടെ ഇസ്ലാമിക വിജ്ഞാനം നേടിയതെന്ന് അധികൃതര്‍ അറിയിച്ചു.

വിശുദ്ധ ഖുര്‍ആന്‍ പഠനം, പ്രവാചക സുന്നത്ത്, വിവിധ ഇസ്ലാമിക ഗ്രന്ഥങ്ങള്‍ എന്നിവയിലാണ് വിദൂര പഠന സംവിധാനത്തിലൂടെയുള്ള ക്ലാസുകള്‍. ലോകത്തിന്റെ ഏത് കോണിലിരുന്നും പ്രവാചക നഗരിയിലെ വിജ്ഞാന സദസ്സുകളില്‍ പങ്കാളികളാകാന്‍ കഴിയുന്ന തരത്തില്‍ അത്യാധുനിക ഡിജിറ്റല്‍ സംവിധാനങ്ങളാണ് ഇതിനായി മസ്ജിദുന്നബവി കാര്യാലയം ഒരുക്കിയിരിക്കുന്നത്.

ഏഷ്യ 5,00,000-ല്‍ അധികം വിദ്യാര്‍ഥകള്‍ ഇതു പ്രയോജനപ്പെടുത്തുന്നുണ്ട്. ആഫ്രിക്ക 4,00,000-ല്‍ അധികം, യൂറോപ്പ് 24,000-ല്‍ അധികം, അമേരിക്ക 10,700-ല്‍ അധികം, ഓസ്ട്രേലിയ 793 വിദ്യാര്‍ഥികള്‍ ഈ പഠനപദ്ധതിയില്‍ ചേര്‍ന്നു. ഏഷ്യയില്‍ നിന്നാണ് ഏറ്റവും കൂടുതല്‍ വിദ്യാര്‍ത്ഥികള്‍ ഈ പഠന പദ്ധതിയില്‍ രജിസ്റ്റര്‍ ചെയ്തിരിക്കുന്നത്. ആഫ്രിക്കന്‍ രാജ്യങ്ങളില്‍ നിന്നുള്ള വിദ്യാര്‍ത്ഥികളുടെ എണ്ണത്തിലും വലിയ വര്‍ധനവുണ്ടായിട്ടുണ്ട്. പാശ്ചാത്യ രാജ്യങ്ങളില്‍ നിന്നും ഓസ്ട്രേലിയയില്‍ നിന്നും നൂറുകണക്കിന് പഠിതാക്കള്‍ പ്രവാചക പള്ളിയുടെ ഈ ഡിജിറ്റല്‍ പ്ലാറ്റ്ഫോമിനെ ആശ്രയിക്കുന്നുണ്ട്.