റിയാദ്: സൗദി അറേബ്യയുടെ സാമ്പത്തിക രംഗത്ത് വന് മാറ്റങ്ങള് കുറിച്ചുകൊണ്ട്, ഈ വര്ഷം മുതല് വിദേശ നിക്ഷേപകര്ക്ക് കൂടുതല് ഇളവുകളും അവസരങ്ങളും പ്രഖ്യാപിച്ചു. റിയാദില് നടന്ന സൗദി-ജപ്പാന് മന്ത്രിതല നിക്ഷേപ ഫോറത്തിലാണ് നിക്ഷേപ മന്ത്രി ഖാലിദ് അല് ഫാലിഹ് നിര്ണ്ണായക വിവരങ്ങള് പങ്കുവെച്ചത്.
വിദേശികള്ക്ക് സൗദിയില് നേരിട്ട് വസ്തുവകകള് വാങ്ങാന് അനുമതി നല്കുന്ന നിയമം ഈ മാസം (2026 ജനുവരി) അവസാനത്തോടെ പൂര്ണ്ണമായി നിലവില് വരും. 2025 ജൂലൈയില് ഇതിനായുള്ള അംഗീകാരം ലഭിച്ചിരുന്നു. ഫെബ്രുവരി 1 മുതല് എല്ലാ വിഭാഗം വിദേശ നിക്ഷേപകര്ക്കും സൗദി ക്യാപിറ്റല് മാര്ക്കറ്റില് നേരിട്ട് നിക്ഷേപവും നടത്താം.
ജപ്പാന്റെ ഏറ്റവും വലിയ ഊര്ജ്ജ വിതരണക്കാരായി സൗദി തുടരും. ഹൈഡ്രജന്, അത്യാധുനിക വ്യവസായങ്ങള് എന്നിവയില് കൂടുതല് സഹകരണം ഉറപ്പാക്കും.
വിഷന് 2030-ന്റെ ഭാഗമായി വിദേശ നിക്ഷേപത്തില് (FDI) വലിയ വര്ദ്ധനവാണ് രാജ്യം ലക്ഷ്യമിടുന്നത്. ആരോഗ്യ പരിചരണം & ഭക്ഷ്യ സുരക്ഷ, നവീന സാങ്കേതികവിദ്യ & സംരംഭകത്വം, അഡ്വാന്സ്ഡ് ഇന്ഡസ്ട്രീസ്, ഗ്രീന് ഹൈഡ്രജന് തുടങ്ങിയ മേഖലകളില് ജപ്പാന് ഉള്പ്പെടെയുള്ള വിദേശ കമ്പനികള്ക്ക് അവസരങ്ങള് ലഭ്യമാണ്.
വിഷന് 2030 ആരംഭിച്ചതു മുതല് സൗദിയിലേക്കുള്ള വിദേശ നിക്ഷേപം ഗണ്യമായി വര്ധിച്ചു. വരും വര്ഷങ്ങളില് ഇത് ലോകത്തെ തന്നെ ഏറ്റവും വലിയ നിക്ഷേപ കേന്ദ്രമായി മാറുമെന്ന് ഖാലിദ് അല് ഫാലിഹ് വ്യക്തമാക്കി.
Related News
