റിയാദ്- 2026 ല് സൗദി അറേബ്യയുടെ സാമ്പത്തിക വിപണിയില് നിര്ണ്ണായകമായ കടപ്പത്ര വിതരണങ്ങള് നടക്കുമെന്ന് നിക്ഷേപ മന്ത്രി എഞ്ചിനീയര് ഖാലിദ് അല് ഫാലിഹ് വെളിപ്പെടുത്തി. സൗദി സ്റ്റോക്ക് എക്സ്ചേഞ്ച് ഗ്രൂപ്പ്, ക്യാപിറ്റല് മാര്ക്കറ്റ് അതോറിറ്റി, നിക്ഷേപ-ധനകാര്യ-സാമ്പത്തിക മന്ത്രാലയങ്ങള് എന്നിവ സംയുക്തമായാണ് ഇതിനായി പ്രവര്ത്തിക്കുന്നതെന്ന് അദ്ദേഹം പറഞ്ഞു.
ഈ പുതിയ മാറ്റങ്ങളിലൂടെ പെന്ഷന് ഫണ്ടുകള്, ആഗോള നിക്ഷേപ ഫണ്ടുകള് തുടങ്ങിയ പുതിയ വിഭാഗം നിക്ഷേപകരെ ആകര്ഷിക്കാന് സൗദി ലക്ഷ്യമിടുന്നു. ഇത് വിപണിയുടെ കരുത്ത് വര്ദ്ധിപ്പിക്കുകയും നിക്ഷേപകരുടെ എണ്ണം വൈവിധ്യവല്ക്കരിക്കുകയും ചെയ്യും.
വരാനിരിക്കുന്ന പരിഷ്കാരങ്ങള് വഴി വ്യക്തികള്ക്ക് നേരിട്ട് നിക്ഷേപ അക്കൗണ്ടുകളും കറന്റ് അക്കൗണ്ടുകളും തുടങ്ങാന് സാധിക്കും. ഇതുവഴി ആളുകള്ക്ക് തങ്ങളുടെ സമ്പാദ്യം നേരിട്ട് സൗദി സാമ്പത്തിക വിപണിയിലേക്ക് നിക്ഷേപമായി മാറ്റാന് കഴിയും. പരമ്പരാഗതമായ ഓഹരികള്ക്കും ബോണ്ടുകള്ക്കും പുറമെ പ്രൈവറ്റ് ക്യാപിറ്റല്, പ്രൈവറ്റ് ലെന്ഡിംഗ്, വെഞ്ചര് ക്യാപിറ്റല്, സിന്ഡിക്കേറ്റഡ് ലോണുകള് തുടങ്ങിയ വ്യത്യസ്ത മൂലധന നിക്ഷേപങ്ങളും വിപണിയില് ലഭ്യമാകും.
ഫെബ്രുവരി 1 മുതല് എല്ലാ വിഭാഗത്തിലുള്ള വിദേശ നിക്ഷേപകര്ക്കും സൗദി സാമ്പത്തിക വിപണിയില് നേരിട്ട് നിക്ഷേപം നടത്താന് അനുമതി നല്കുമെന്ന് ക്യാപിറ്റല് മാര്ക്കറ്റ് അതോറിറ്റി നേരത്തെ പ്രഖ്യാപിച്ചിരുന്നു. ഇതിന്റെ തുടര്ച്ചയായാണ് വിപണിയില് കൂടുതല് ഉദാരവല്ക്കരണ നടപടികള് നടപ്പിലാക്കുന്നത്.
Related News
