ജിദ്ദ: പുസ്തകത്താളുകളിലെ വിസ്മയങ്ങള് പ്രവാസി ഹൃദയങ്ങളിലേക്ക് പകര്ന്നുനല്കി, ഫോക്കസ് ഇന്റര്നാഷണല് ജിദ്ദ ഡിവിഷന് സംഘടിപ്പിച്ച മൂന്നാമത് 'ബുക്ക് ഹറാജ്' സമാപിച്ചു. ലിറ്റ് എക്സ്പോയുടെ ഭാഗമായി സംഘടിപ്പിച്ച ഈ പുസ്തകമേള, വായനയെ സ്നേഹിക്കുന്ന നൂറുകണക്കിന് ആളുകളുടെ സജീവ പങ്കാളിത്തം കൊണ്ടു ശ്രദ്ധേയമായി.
വായിച്ചുതീര്ന്ന പുസ്തകങ്ങള് കുറഞ്ഞ വിലയ്ക്ക് കൈമാറാനും, ഏറെ നാളായി തേടിയിരുന്ന കൃതികള് സ്വന്തമാക്കാനും അവസരമൊരുക്കിയ ' 'ബുക്ക് ഹറാജ്' ജിദ്ദയിലെ പുസ്തകമേളകള്ക്ക് പുതിയൊരു മാതൃക തന്നെ സൃഷ്ടിച്ചു. രണ്ടായിരത്തിലധികം പുസ്തകങ്ങളാണ് മേളയില് പ്രദര്ശിപ്പിച്ചത്. പ്രവാസി എഴുത്തുകാരുടെ കൃതികള് മുതല് ആത്മകഥകള്, നോവലുകള്, കവിതകള്, കുട്ടികളുടെ പുസ്തകങ്ങള്, അക്കാദമിക് ഗ്രന്ഥങ്ങള്, മത ഗ്രന്ഥങ്ങള് തുടങ്ങി വൈവിധ്യമാര്ന്ന ശേഖരം വായനക്കാര്ക്കായി ഒരുക്കിയിരുന്നു. പ്രവാസി എഴുത്തുകാരുടെ പുതിയ പുസ്തകങ്ങളുടെ പ്രകാശനവും ചടങ്ങിന്റെ ഭാഗമായി നടന്നു.
പ്രശസ്ത മാധ്യമപ്രവര്ത്തകന് അഷ്റഫ് തൂണേരി മേള ഉദ്ഘാടനം ചെയ്തു. ആര്ട്ടിഫിഷ്യല് ഇന്റലിജന്സ് (AI) യുഗത്തിലും വായനയുടെ പ്രസക്തി കുറയുന്നില്ലെന്ന് അദ്ദേഹം ഓര്മ്മിപ്പിച്ചു. സ്ക്രീനുകളില് നിന്നുള്ള വായനയും കൈയിലെടുത്ത് ഒരു പുസ്തകം വായിക്കുന്ന അനുഭവവും തമ്മിലുള്ള വ്യത്യാസം അദ്ദേഹം ചൂണ്ടിക്കാട്ടി. വായനയെ പ്രോത്സാഹിപ്പിക്കുന്ന ഫോക്കസ് ഇന്റര്നാഷണലിന്റെ പ്രവര്ത്തനം പ്രശംസനീയമാണെന്നും അദ്ദേഹം പറഞ്ഞു.
ബുക്ക് ഹരാജ് കമ്മിറ്റി ചെയര്മാന് സലാഹ് കാരാടന് അധ്യക്ഷത വഹിച്ചു. പ്രോഗ്രാം കമ്മിറ്റി കണ്വീനര് ഷഫീഖ് സ്വാഗതം ആശംസിച്ചു. മാധ്യമപ്രവര്ത്തകന് വഹീദ് സമാന്, പ്രമുഖ ബ്ലോഗര് ബഷീര് വള്ളിക്കുന്ന് എന്നിവര് ആശംസകള് നേര്ന്നു. സാംസ്കാരികമാധ്യമ രംഗത്തെ അന്പതിലധികം പ്രമുഖര് ചടങ്ങില് പങ്കെടുത്തു. കമ്മിറ്റി കണ്വീനര് റഷാദ് കരുമാര നന്ദി പറഞ്ഞു.
ലിറ്റ് എക്സ്പോയുടെ ഭാഗമായി ഒരുക്കിയ വിവിധ സ്റ്റാളുകള് സന്ദര്ശകരുടെ ശ്രദ്ധ പിടിച്ചുപറ്റി. വനിതകളുടെയും വിദ്യാര്ത്ഥിനികളുടെയും കലാപാടവം തെളിയിക്കുന്ന പെയിന്റിംഗുകളും കാലിഗ്രാഫി കൃതികളും പ്രദര്ശിപ്പിച്ചു. ജിദ്ദ കൊടിമരം, പഴയ ജിദ്ദ നഗരം, വയനാട് ചുരം എന്നിവയെ ആസ്പദമാക്കിയ ചിത്രങ്ങള് കാഴ്ചക്കാരുടെ പ്രത്യേക പ്രശംസ നേടി. വിവിധ സംഘടനാ പ്രതിനിധികളും സാമൂഹ്യ പ്രമുഖരുമായി പ്രിന്സാദ് പാറായി നടത്തിയ ആശയ വിനിമയവും ശ്രദ്ധേയമായി
എ.പി.ജെ. അബ്ദുല് കലാം, വൈക്കം മുഹമ്മദ് ബഷീര്, സ്റ്റീഫന് ഹോക്കിംഗ്, എസ്.കെ. പൊറ്റക്കാട് തുടങ്ങിയവരുടെ സംഭാവനകളും പുസ്തകങ്ങളും പരിചയപ്പെടുത്തിയ ക്യാന്വാസുകളും മേളയ്ക്ക് ഗാംഭീര്യം പകര്ന്നു. പൗലോ കൊയ്ലോയുടെ കഥാപാത്രങ്ങളെ ആസ്പദമാക്കി ഒരുക്കിയ ശില്പങ്ങള് ഏറെ കൗതുകം സൃഷ്ടിച്ചു.
കാപ്പിക്കുരുവിന്റെ കഥ പറഞ്ഞ ബുക്ക് എ കോഫി പവലിയനും, ഫോട്ടോ ബൂത്തും ഇന്ത്യന് വിമന്സ് ഓര്ഗനൈസേഷന് (IWO) ഒരുക്കിയ രുചികരമായ ഭക്ഷണ സ്റ്റാളും പങ്കെടുത്തവര്ക്ക് പുത്തന് അനുഭവമായി.
മലയാളികളുടെ പുസ്തകത്തോടുള്ള അടങ്ങാത്ത ആവേശം വിളിച്ചോതുന്ന തിരക്കാണ് ഓരോ സ്റ്റാളുകളിലും അനുഭവപ്പെട്ടത്. വായന സംസ്കാരത്തിന്റെ ശക്തമായ പുനരുജ്ജീവനമായാണ് ജിദ്ദയിലെ 'ബുക്ക് ഹരാജ്' മാറിയത്.
