അസീര്- സൗദി അറേബ്യയിലെ അസീര് പ്രവിശ്യയിലെ സൗദ കൊടുമുടികളില് 20 ഓളം പുരാതന ശിലാചിത്രങ്ങള് കണ്ടെത്തിയതായി ഹെറിറ്റേജ് കമ്മീഷന് അറിയിച്ചു. രാജ്യത്തിന്റെ ചരിത്രത്തിലേക്കും പൗരാണിക സംസ്കാരത്തിലേക്കും വെളിച്ചം വീശുന്നതാണ് ഈ കണ്ടെത്തല്. പാറകളില് കൊത്തിവെച്ച രൂപങ്ങള് ആയിരക്കണക്കിന് വര്ഷം പഴക്കമുള്ളതാണെന്ന് കരുതപ്പെടുന്നു.
സൗദിയിലെ വിനോദസഞ്ചാര മേഖലയെ പരിപോഷിപ്പിക്കുന്നതിനും പൈതൃക സംരക്ഷണത്തിനും നല്കുന്ന പ്രാധാന്യത്തിന്റെ ഭാഗമായാണ് പര്യവേഷണം നടത്തിയത്. വേട്ടയാടല് രംഗങ്ങള്, മൃഗങ്ങളുടെ രൂപങ്ങള് തുടങ്ങിയവയാണ് ചിത്രങ്ങളില് ഭൂരിഭാഗവും. ഇവയെക്കുറിച്ച് കൂടുതല് പഠനങ്ങള് പുരോഗമിക്കുകയാണ്.
യുനെസ്കോയുടെ ലോക പൈതൃക പട്ടികയിലേക്ക് കൂടുതല് സൗദി സ്ഥലങ്ങളെ എത്തിക്കാനുള്ള ശ്രമങ്ങള്ക്ക് ഇത് കരുത്ത് പകരും. ചരിത്രപ്രേമികളെയും സഞ്ചാരികളെയും ആകര്ഷിക്കാന് സൗദ മേഖലയെ ഈ കണ്ടെത്തല് സഹായിക്കും. പുരാവസ്തു ഗവേഷണ മേഖലയില് സൗദിക്ക് ആഗോള ശ്രദ്ധ നേടാന് ഇതിലൂടെ സാധിച്ചു.
ഭാവി തലമുറയ്ക്കായി ഈ പൈതൃകങ്ങള് സംരക്ഷിക്കാന് കര്ശന നടപടികള് സ്വീകരിക്കുമെന്ന് ഹെറിറ്റേജ് കമ്മീഷന് വ്യക്തമാക്കി. രാജ്യത്തിന്റെ സാംസ്കാരിക വ്യക്തിത്വം ഉയര്ത്തിപ്പിടിക്കുന്നതില് ഇത്തരം ചരിത്ര ശേഷിപ്പുകള്ക്ക് വലിയ പങ്കുണ്ട്. കൂടുതല് പര്യവേഷണങ്ങള് ഇനിയും തുടരുമെന്ന് അധികൃതര് അറിയിച്ചു.
Related News
