റിയാദ്: സൗദി അറേബ്യയുടെ ഗതാഗത ചരിത്രത്തില്‍ വിസ്മയകരമായ റെക്കോഡ് നേട്ടവുമായി റെയില്‍വേ മേഖല. 2025-ന്റെ അവസാന പാദത്തില്‍ (ഒക്ടോബര്‍ - ഡിസംബര്‍) രാജ്യത്തെ റെയില്‍വേ സേവനങ്ങളെ ആശ്രയിച്ചത് 4.6 കോടിയിലധികം യാത്രക്കാരാണ്. മുന്‍വര്‍ഷത്തെ അപേക്ഷിച്ച് 199 ശതമാനത്തിന്റെ അമ്പരപ്പിക്കുന്ന വളര്‍ച്ചയാണ് ഈ മേഖലയില്‍ രേഖപ്പെടുത്തിയതെന്ന് പബ്ലിക് ട്രാന്‍സ്പോര്‍ട്ട് അതോറിറ്റി (TGA) അറിയിച്ചു. സൗദി വിഷന്‍ 2030-ന്റെ ഭാഗമായുള്ള ഗതാഗത പരിഷ്‌കാരങ്ങള്‍ ഫലം കാണുന്നതിന്റെ സൂചനയാണിത്.

നഗരങ്ങള്‍ക്കുള്ളിലെ റെയില്‍ ഗതാഗതത്തിലാണ് ഏറ്റവും വലിയ കുതിച്ചുചാട്ടം ഉണ്ടായത്. ആകെ യാത്രക്കാരില്‍ 3.2 കോടി പേരും യാത്ര ചെയ്തത് റിയാദ് മെട്രോയിലാണ്. നഗരത്തിലെ ഗതാഗതക്കുരുക്ക് കുറയ്ക്കുന്നതിലും പൊതുജനങ്ങള്‍ക്ക് സുഗമമായ യാത്രയൊരുക്കുന്നതിലും മെട്രോ നിര്‍ണായക പങ്കുവഹിച്ചു.

ജിദ്ദ കിങ് അബ്ദുല്‍ അസീസ് വിമാനത്താവളത്തിലെ ഓട്ടോമേറ്റഡ് ട്രാന്‍സ്പോര്‍ട്ട് ഉപയോഗിച്ചത് 1.06 കോടി പേരാണ്. റിയാ് അമീറ നൂറ സര്‍വകലാശാല കാമ്പസിനുള്ളിലെ മെട്രോ സര്‍വീസ് 9.82 ലക്ഷം പേര്‍ പ്രയോജനപ്പെടുത്തി.
മക്കയെയും മദീനയെയും ബന്ധിപ്പിച്ചുള്ള ദീര്‍ഘദൂര സര്‍വീസുകളില്‍ തീര്‍ഥാടകര്‍ക്കും വിനോദസഞ്ചാരികള്‍ക്കും പ്രിയപ്പെട്ട ഹറമൈന്‍ അതിവേഗ റെയില്‍വേ ഒന്നാമതെത്തി. 23 ലക്ഷം പേരാണ് ഈ പാതയില്‍ യാത്ര ചെയ്തത്. കൂടാതെ കിഴക്കന്‍ റെയില്‍വേ (ദമ്മാം-റിയാദ്): 3.67 ലക്ഷം യാത്രക്കാരും നോര്‍ത്തേണ്‍ റെയില്‍വേ (റിയാദ്-അല്‍ജൗഫ്): 2.34 ലക്ഷം യാത്രക്കാരം പ്രയോജനപ്പെടുത്തി.

ചരക്ക് നീക്കത്തിലും വന്‍ നേട്ടം
യാത്രക്കാരെ കൂടാതെ രാജ്യത്തിന്റെ സമ്പദ്വ്യവസ്ഥയുടെ നട്ടെല്ലായ ചരക്ക് നീക്കത്തിലും റെയില്‍വേ വന്‍ കരുത്ത് തെളിയിച്ചു. മൂന്ന് മാസത്തിനിടെ 40.9 ലക്ഷം ടണ്‍ ധാതുക്കളും വിവിധ ചരക്കുകളും റെയില്‍വേ വഴി ലക്ഷ്യസ്ഥാനത്തെത്തിച്ചു. ഇതിനു പുറമെ 2.27 ലക്ഷം കണ്ടയ്നറുകളും റെയില്‍ മാര്‍ഗം നീക്കം ചെയ്തു.

രാജ്യത്തിന്റെ വിതരണ ശൃംഖല ശക്തിപ്പെടുത്തുന്നതില്‍ റെയില്‍വേ നിര്‍ണായക ശക്തിയായി മാറിക്കഴിഞ്ഞു എന്ന് പബ്ലിക് ട്രാന്‍സ്പോര്‍ട്ട് അതോറിറ്റി വ്യക്തമാക്കി. ദേശീയ ലോജിസ്റ്റിക് തന്ത്രത്തിന്റെ ഭാഗമായി വരും വര്‍ഷങ്ങളില്‍ കൂടുതല്‍ പരിഷ്‌കാരങ്ങള്‍ ഈ മേഖലയില്‍ നടപ്പിലാക്കും.