ദുബായ്: വരാനിരിക്കുന്ന നിയമസഭാ തെരഞ്ഞെടുപ്പില് പ്രവാസി സമൂഹത്തിന് അര്ഹമായ പ്രാതിനിധ്യം നല്കണമെന്ന ആവശ്യവുമായി കെ.എം.സി.സി. ഇക്കാര്യം മുസ്ലിം ലീഗ് സംസ്ഥാന എക്സിക്യൂട്ടീവ് യോഗത്തില് ഔദ്യോഗികമായി ഉന്നയിച്ചതായി കെ.എം.സി.സി ഗ്ലോബല് ജനറല് സെക്രട്ടറി പുത്തൂര് റഹ്മാന് ദുബായില് പറഞ്ഞു.
കഴിഞ്ഞ 45 വര്ഷമായി കെ.എം.സി.സി ഇത്തരമൊരു ആവശ്യം മുന്നോട്ടുവെച്ചിരുന്നില്ല. എന്നാല്, പ്രവാസി വോട്ടുകള് നിര്ണായകമാകുന്ന നിലവിലെ രാഷ്ട്രീയ സാഹചര്യത്തില് സാധാരണക്കാരായ പ്രവാസികളുടെ ശബ്ദം നിയമസഭയില് കേള്പ്പിക്കാന് പ്രവാസി പ്രതിനിധി തന്നെ വേണമെന്നാണ് സംഘടനയുടെ നിലപാട്.
നേരത്തെ പി.വി. അബ്ദുല് വഹാബ്, പാറക്കല് അബ്ദുള്ള തുടങ്ങിയ പ്രവാസികള്ക്ക് സീറ്റ് നല്കിയിട്ടുണ്ടെങ്കിലും അവര് വ്യവസായ പ്രമുഖര് എന്ന നിലയിലാണ് പരിഗണിക്കപ്പെട്ടത്. ഇത്തവണ പ്രസ്ഥാനത്തിന് വേണ്ടി പ്രവര്ത്തിക്കുന്ന സാധാരണക്കാരായ പ്രവാസികളെ പരിഗണിക്കണമെന്നാണ് കെ.എം.സി.സി ആവശ്യപ്പെടുന്നത്.
മത്സരിക്കേണ്ട വ്യക്തിയെയോ മണ്ഡലത്തെയോ കുറിച്ച് കെ.എം.സി.സി നിര്ദ്ദേശങ്ങള് നല്കിയിട്ടില്ല. ഇക്കാര്യത്തില് അന്തിമ തീരുമാനം പാര്ട്ടി കൈക്കൊള്ളുമെന്ന് പുത്തൂര് റഹ്മാന് വ്യക്തമാക്കി. പ്രവാസികള് നേരിടുന്ന നിരന്തരമായ പ്രശ്നങ്ങള്ക്ക് പരിഹാരം കാണാന് പ്രവാസി സമൂഹം രാഷ്ട്രീയമായി ഒറ്റക്കെട്ടായി നില്ക്കേണ്ടത് അനിവാര്യമാണെന്നും അദ്ദേഹം ഓര്മ്മിപ്പിച്ചു.
Related News
