റിയാദ്: സൗദി അറേബ്യയും യുണൈറ്റഡ് കിംഗ്ഡവും തമ്മിലുള്ള സര്‍ഗ്ഗാത്മക സഹകരണം ശക്തമാക്കുന്നതിന്റെ ഭാഗമായി റിയാദില്‍ പ്രഥമ 'യുകെഎസ്എ (UKSA) ക്രിയേറ്റീവ് ഫോറം' സംഘടിപ്പിച്ചു. ബ്രിട്ടീഷ് മുന്‍ സാംസ്‌കാരിക മന്ത്രി ലോര്‍ഡ് എഡ് വൈസിയും പ്രമുഖ വ്യവസായി അബ്ദുല്‍ അസീസ് അല്‍ മുഖൈതീബും പരിപാടിയില്‍ പങ്കെടുത്തു. ഇരുരാജ്യങ്ങളും തമ്മിലുള്ള ആശയവിനിമയത്തിനും നിക്ഷേപ അവസരങ്ങള്‍ക്കും പുതിയ പാതയൊരുക്കുന്നതായിരുന്നു സംഗമം.

ബ്രിട്ടീഷ് സര്‍ഗ്ഗാത്മക സമ്പദ്വ്യവസ്ഥയ്ക്ക് സൗദി അറേബ്യയില്‍ നിന്ന് ഒരുപാട് കാര്യങ്ങള്‍ പഠിക്കാനുണ്ടെന്ന് ലോര്‍ഡ് എഡ് വൈസി പറഞ്ഞു. 'പാശ്ചാത്യ രാജ്യങ്ങള്‍ സൗദിയിലെത്തി കാര്യങ്ങള്‍ നിര്‍ദ്ദേശിക്കുന്ന രീതിക്ക് മാറ്റം വന്നിരിക്കുന്നു. ഇന്ന് സൗദിയിലെ സാംസ്‌കാരിക രംഗത്തെ അത്ഭുതകരമായ മുന്നേറ്റങ്ങളെക്കുറിച്ച് ലണ്ടനില്‍ വന്നു വിശദീകരിക്കാന്‍ കൂടുതല്‍ സൗദി പ്രതിഭകളെ ഞങ്ങള്‍ ആഗ്രഹിക്കുന്നു,' അദ്ദേഹം വ്യക്തമാക്കി.

സൗദി അറേബ്യയുടെ വിഷന്‍ 2030-ന്റെ ഭാഗമായി സര്‍ഗ്ഗാത്മക മേഖലയെ (Creative Sector) ജിഡിപിയുടെ 3 ശതമാനത്തിലേക്ക് എത്തിക്കുകയാണ് ലക്ഷ്യം. ഏകദേശം 3,46,000 പുതിയ തൊഴിലുകള്‍ ഈ മേഖലയില്‍ സൃഷ്ടിക്കപ്പെടും. സാംസ്‌കാരിക മേഖലയുമായി ബന്ധപ്പെട്ട വിഷയങ്ങളില്‍ ബിരുദം നേടുന്നവരുടെ എണ്ണം 2,55,000 ആയി ഉയര്‍ത്തും. സ്വകാര്യ മേഖലയുമായി സഹകരിച്ച് 13.8 ബില്യണ്‍ റിയാല്‍ ഈ മേഖലയില്‍ നിക്ഷേപിക്കാനാണ് സാംസ്‌കാരിക വികസന ഫണ്ട് ലക്ഷ്യമിടുന്നത്.

സൗദിയും യുകെയും തമ്മിലുള്ള ബന്ധം ഒരു 'പാലം' പോലെയാണെന്ന് മുങ് ഇന്‍വെസ്റ്റ്മെന്റ് ചെയര്‍മാന്‍ അബ്ദുല്‍ അസീസ് അല്‍ മുഖൈതീബ് അഭിപ്രായപ്പെട്ടു. കഴിഞ്ഞ 20 വര്‍ഷമായി ഈ രംഗത്ത് പ്രവര്‍ത്തിക്കുന്ന അദ്ദേഹം, സൗദിയിലെ യുവപ്രതിഭകളെ വളര്‍ത്തിയെടുക്കുന്നതിലും അന്താരാഷ്ട്ര തലത്തില്‍ അവര്‍ക്ക് അവസരങ്ങള്‍ ഒരുക്കുന്നതിലും ശ്രദ്ധ കേന്ദ്രീകരിക്കുന്നു. മ്യൂസിയം മാനേജ്മെന്റ്, ടൂറിസം, ക്യൂറേഷന്‍ തുടങ്ങിയ മേഖലകളില്‍ മുമ്പില്ലാത്ത വിധം പുതിയ കരിയര്‍ സാധ്യതകള്‍ സൗദിയില്‍ തുറക്കപ്പെട്ടിട്ടുണ്ടെന്ന് ചര്‍ച്ചയില്‍ പങ്കെടുത്ത പ്രമുഖര്‍ ചൂണ്ടിക്കാട്ടി.

സൗദി സാംസ്‌കാരിക മന്ത്രി ഫൈസല്‍ ബിന്‍ അബ്ദുല്ല ബിന്‍ ഫര്‍ഹാന്‍ രാജകുമാരന്റെ നേതൃത്വത്തില്‍ സാംസ്‌കാരിക വികസന ഫണ്ട് വഴി ഇതുവരെ 1,517 സംരംഭകര്‍ക്ക് സഹായം നല്‍കിയിട്ടുണ്ട്. സാംസ്‌കാരിക മേഖലയിലെ സാമ്പത്തിക വിടവ് 45 ശതമാനത്തോളം നികത്താനും ഈ പദ്ധതികള്‍ സഹായിക്കും.