റിയാദ്: സൗദി അറേബ്യയില് പ്രവാസികള്ക്ക് ഫൈനല് എക്സിറ്റ് ലഭിക്കുന്നതിനുള്ള നിബന്ധനകളില് സുപ്രധാന ഭേദഗതി. ഇഖാമയുടെ (താമസരേഖ) കാലാവധി ഒരു മാസത്തില് താഴെയാണെങ്കിലും ഇനി മുതല് ഫൈനല് എക്സിറ്റ് ലഭിക്കും. നിലവില് ഇഖാമയ്ക്ക് കുറഞ്ഞത് ഒരു മാസത്തെ കാലാവധിയുണ്ടെങ്കില് മാത്രമേ എക്സിറ്റ് അടിക്കാന് സാധിക്കുമായിരുന്നുള്ളൂ. ഈ നിബന്ധനയിലാണ് ഇപ്പോള് മാറ്റം വരുത്തിയിരിക്കുന്നത്.
ഇഖാമയുടെ കാലാവധി തീരാന് ഒരു ദിവസം മാത്രമേ ബാക്കിയുള്ളൂവെങ്കിലും ഇനി മുതല് ഫൈനല് എക്സിറ്റ് നടപടികള് പൂര്ത്തിയാക്കാം. മുന്പ് ഒരു മാസത്തില് താഴെ കാലാവധിയുള്ളവര് ഇഖാമ വീണ്ടും പുതുക്കിയ ശേഷമായിരുന്നു എക്സിറ്റ് അടിച്ചിരുന്നത്. പുതിയ മാറ്റത്തോടെ ഈ അധിക ബാധ്യത പ്രവാസികള്ക്ക് ഒഴിവാകും. ഫൈനല് എക്സിറ്റ് ലഭിച്ചു കഴിഞ്ഞാല് അടുത്ത 60 ദിവസം വരെ രാജ്യത്ത് നിയമപരമായി തുടരാന് അനുവാദമുണ്ടാകും.
നേരത്തെ പ്രാബല്യത്തിലുണ്ടായിരുന്ന ഇതേ നിയമം പിന്നീട് ഭേദഗതി ചെയ്താണ് ഒരു മാസത്തെ കാലാവധി നിര്ബന്ധമാക്കിയിരുന്നത്. എന്നാല് കഴിഞ്ഞ ദിവസം മുതല് പഴയ രീതിയിലേക്ക് നിയമം പുനഃസ്ഥാപിച്ചതായി സര്വീസ് ഏജന്സി രംഗത്തുള്ളവര് പറയുന്നു.
സ്പോണ്സര്ഷിപ്പ് മാറ്റം, തൊഴില് കരാര് അവസാനിക്കല് തുടങ്ങിയ കാരണങ്ങളാല് നാട്ടിലേക്ക് മടങ്ങാന് ആഗ്രഹിക്കുന്ന പ്രവാസികള്ക്ക് വലിയ ആശ്വാസമാണ് ഈ തീരുമാനം.
Related News
