തായിഫ്: സാംസ്‌കാരിക വൈവിധ്യങ്ങളുടെയും അറിവിന്റെയും വിരുന്നൊരുക്കി സൗദി ലിറ്ററേച്ചര്‍, പബ്ലിഷിംഗ് ആന്‍ഡ് ട്രാന്‍സ്ലേഷന്‍ കമ്മീഷന്‍ സംഘടിപ്പിച്ച മൂന്നാമത് 'റൈറ്റേഴ്സ് ആന്‍ഡ് റീഡേഴ്സ്' ഫെസ്റ്റിവല്‍ പ്രൗഢഗംഭീരമായി സമാപിച്ചു. ജനുവരി 15 വരെ നീണ്ടുനിന്ന മേളയില്‍ 3,70,000-ത്തിലധികം സന്ദര്‍ശകരാണ് എത്തിയത്. ഇത് ഫെസ്റ്റിവലിന്റെ ചരിത്രത്തിലെ തന്നെ റെക്കോര്‍ഡ് പങ്കാളിത്തമാണ്.

സൗദിയുടെ സാംസ്‌കാരിക കലണ്ടറിലെ ഏറ്റവും പ്രധാനപ്പെട്ട പരിപാടികളിലൊന്നായി ഈ ഫെസ്റ്റിവല്‍ മാറിയെന്ന് കമ്മീഷന്‍ സി.ഇ.ഒ അബ്ദുല്ലത്തീഫ് അല്‍വാസില്‍ പറഞ്ഞു. സാഹിത്യത്തെ ദൈനംദിന ജീവിതത്തിന്റെ ഭാഗമാക്കാനും രാജ്യത്തുടനീളം സര്‍ഗ്ഗാത്മക ഇടങ്ങള്‍ വ്യാപിപ്പിക്കാനുമുള്ള തന്ത്രപരമായ നീക്കങ്ങളുടെ വിജയമാണ് ഈ ജനപങ്കാളിത്തമെന്നും അദ്ദേഹം കൂട്ടിച്ചേര്‍ത്തു.

യുനെസ്‌കോയുടെ 'ക്രിയേറ്റീവ് സിറ്റി ഓഫ് ലിറ്ററേച്ചര്‍' പദവി ലഭിച്ച ആദ്യ സൗദി നഗരമായ തായിഫിന്റെ ചരിത്രപരമായ പ്രാധാന്യത്തെ വിളിച്ചോതുന്നതായിരുന്നു ഇത്തവണത്തെ മേള. 2023-ലാണ് തായിഫിന് ഈ ആഗോള അംഗീകാരം ലഭിച്ചത്.

പ്രമുഖ എഴുത്തുകാരും വായനക്കാരും തമ്മിലുള്ള സംവാദങ്ങള്‍, ശില്‍പ്പശാലകള്‍, സാഹിത്യ സെമിനാറുകള്‍. പ്രാദേശിക-അന്തര്‍ദേശീയ പ്രസാധകരുടെ സാന്നിധ്യം, സംഗീതം, നാടകം, കല എന്നിവ സമന്വയിപ്പിച്ചുകൊണ്ടുള്ള പ്രത്യേക വിഭാഗങ്ങള്‍, പുതിയ തലമുറയില്‍ വായനാശീലം വളര്‍ത്തുന്നതിനായി പ്രത്യേകം തയ്യാറാക്കിയ 'ലിറ്റില്‍ റീഡര്‍' കോര്‍ണറുകള്‍ എന്നിവളാല്‍ സാഹിത്യത്സവം ശ്രദ്ധേയമായിരുന്നു.

സൗദി അറേബ്യയുടെ വിഷന്‍ 2030-ന്റെ ഭാഗമായി സാംസ്‌കാരിക രംഗത്ത് നടപ്പിലാക്കുന്ന വിപ്ലവകരമായ മാറ്റങ്ങളുടെ പ്രതിഫലനമാണ് തായിഫില്‍ കണ്ടത്. പ്രാദേശിക പ്രതിഭകളെ പ്രോത്സാഹിപ്പിക്കുന്നതിനൊപ്പം ആഗോള സാംസ്‌കാരിക വിനിമയത്തിനുള്ള വേദിയായും മേള മാറി.