ദവാദ്മി: റിയാദില് നിന്നും 230 കിലോമീറ്റര് അകലെ ദവാദ്മിയില് നിര്മ്മാണത്തിലിരുന്ന മതില് തകര്ന്നുവീണ് രണ്ട് ഇന്ത്യന് തൊഴിലാളികള് മരിച്ചു. ഉപജീവനത്തിനായി പ്രവാസലോകത്തെത്തി വെറും രണ്ട് മാസത്തിനുള്ളിലാണ് വിധി ഇവരെ കവര്ന്നെടുത്തത്. മാരിദുരൈ മൂര്ത്തി (46, തിരുനെല്വേലി, തമിഴ്നാട്), സീനുല് ഹഖ് (36, കൊല്ക്കത്ത, പശ്ചിമ ബംഗാള്) എന്നിവരാണ് മരിച്ചത്.
അല് ഷര്ഹാന് കണ്സ്ട്രക്ഷന് കമ്പനിയിലെ തൊഴിലാളികളാണ് അപകടത്തില്പെട്ടത്. ജോലിയില് ഏര്പ്പെട്ടിരിക്കെ നിര്മ്മാണത്തിലിരുന്ന മതില് പെട്ടെന്ന് ഇടിഞ്ഞുവീഴുകയായിരുന്നു. മൃതദേഹങ്ങള് എത്രയും വേഗം നാട്ടിലെത്തിക്കാനുള്ള ശ്രമങ്ങള് റിയാദ് കെ.എം.സി.സി വെല്ഫെയര് വിങ് ചെയര്മാന് റഫീഖ് പുല്ലൂര്, മലപ്പുറം ജില്ല വെല്ഫെയര് വിങ് ജനറല് കണ്വീനര് റിയാസ് തിരൂര്ക്കാട് എന്നിവരുടെ നേതൃത്വത്തില് നടന്നു വരുന്നു. ദവാദ്മി കെ.എം.സി.സി ഭാരവാഹികളായ ഫിറോസ് മുക്കം, ഷാഫി കാവനൂര് എന്നിവരും രംഗത്തുണ്ട്.
Related News
