റിയാദ്: സൗദി അറേബ്യയുടെ നഗരക്കാഴ്ചകള്‍ മാറുന്നതിനനുസരിച്ച് രാജ്യത്തെ ബിസിനസ് ഭൂപടത്തിലും വന്‍ മാറ്റങ്ങള്‍ ദൃശ്യമാകുന്നു. റിയാദിലും ജിദ്ദയിലും മക്കയിലുമെല്ലാം തലയുയര്‍ത്തി നില്‍ക്കുന്ന പടുകൂറ്റന്‍ ടവറുകളുടെ പുറംഭാഗം വൃത്തിയാക്കുന്ന മേഖലയില്‍ കഴിഞ്ഞ ഒരു വര്‍ഷത്തിനിടെ 31 ശതമാനത്തിന്റെ അമ്പരപ്പിക്കുന്ന വളര്‍ച്ചയാണ് രേഖപ്പെടുത്തിയത്.

വാണിജ്യ മന്ത്രാലയം പുറത്തുവിട്ട കണക്കുകള്‍ പ്രകാരം, ക്ലീനിംഗ് സേവന രംഗത്ത് പ്രവര്‍ത്തിക്കുന്ന സ്ഥാപനങ്ങളുടെ എണ്ണത്തില്‍ വന്‍ വര്‍ധനവാണുണ്ടായിരിക്കുന്നത്. 2024 അവസാനം ഈ രംഗത്ത് 11,415 സ്ഥാപനങ്ങള്‍ ഉണ്ടായിരുന്നത്. 2025 നവംബറില്‍ 14,981 സ്ഥാപനങ്ങളായി ഉയര്‍ന്നു.

വെറും 11 മാസത്തിനുള്ളില്‍ മൂവായിരത്തിലധികം പുതിയ സ്ഥാപനങ്ങളാണ് ഈ രംഗത്തേക്ക് കടന്നുവന്നത്. വിഷന്‍ 2030-ന്റെ ഭാഗമായി പുതിയ നഗരങ്ങളും വന്‍കിട വാണിജ്യ സമുച്ചയങ്ങളും ഉയരുന്നത് അന്തര്‍ദേശീയ നിക്ഷേപകരെയും ഈ മേഖലയിലേക്ക് ആകര്‍ഷിക്കുന്നുണ്ട്.

നിലവില്‍ ഏകദേശം 300 മില്യണ്‍ റിയാലിന്റെ വിപണി മൂല്യമുള്ള ഈ മേഖല, വരും വര്‍ഷങ്ങളില്‍ സൗദിയിലെ ഏറ്റവും ലാഭകരമായ ബിസിനസ് ശാഖകളില്‍ ഒന്നായി മാറുമെന്നാണ് സാമ്പത്തിക വിദഗ്ധരുടെ വിലയിരുത്തല്‍. റിയാദിലെയും ദമ്മാമിലെയും പുതുതായി നിര്‍മ്മിക്കപ്പെടുന്ന ഗ്ലാസ് ടവറുകള്‍ക്ക് കൃത്യമായ ഇടവേളകളില്‍ വിദഗ്ധ ശുചീകരണം ആവശ്യമാണെന്നത് ഈ ബിസിനസിന്റെ സാധ്യതകള്‍ വര്‍ധിപ്പിക്കുന്നു.