അല്ഉല: സൗദി അറേബ്യയുടെ സാംസ്കാരിക തനിമയും പാശ്ചാത്യ ഓര്ക്കസ്ട്രയുടെ പ്രൗഢിയും ഒത്തുചേര്ന്ന 'മാസ്റ്റര്പീസസ് ഓഫ് സൗദി ഓര്ക്കസ്ട്ര' സംഗീത നിശയ്ക്ക് അല്ഉലയിലെ മരായ കണ്സേര്ട്ട് ഹാളില് ഉജ്ജ്വല തുടക്കം. സൗദി സാംസ്കാരിക മന്ത്രിയും മ്യൂസിക് കമ്മീഷന് ചെയര്മാനുമായ പ്രിന്സ് ബദര് ബിന് അബ്ദുള്ളയുടെ രക്ഷാകര്തൃത്വത്തില് മ്യൂസിക് കമ്മീഷനാണ് പരിപാടി സംഘടിപ്പിച്ചത്.
പ്രശസ്ത മസ്ട്രോ ഹാനി ഫര്ഹത്തിന്റെ നേതൃത്വത്തിലുള്ള സൗദി നാഷണല് ഓര്ക്കസ്ട്രയും കൊയറും ചേര്ന്നാണ് കാണികളെ സംഗീതത്തിന്റെ പുതിയൊരു ലോകത്തേക്ക് ആനയിച്ചത്. സൗദിയുടെ തനത് സംഗീത സ്വത്വത്തെ ഓര്ക്കസ്ട്രയുമായി സമന്വയിപ്പിച്ചുകൊണ്ടുള്ള അവതരണം ഏറെ ശ്രദ്ധേയമായി. ചരിത്രവും ആധുനിക സര്ഗ്ഗാത്മകതയും ഒരുപോലെ പ്രതിഫലിക്കുന്ന തരത്തില് തിരഞ്ഞെടുത്ത സംഗീത ശകലങ്ങളാണ് വേദിയില് അവതരിപ്പിക്കപ്പെട്ടത്.
സംഗീതത്തിനൊപ്പം ദൃശ്യവിരുന്നൊരുക്കാന് തിയേറ്റര് ആന്ഡ് പെര്ഫോമിംഗ് ആര്ട്സ് കമ്മീഷന്റെ നേതൃത്വത്തില് സൗദി ഫോക്ലോര് കലാരൂപങ്ങളും വേദിയില് അണിനിരന്നു. സാമ്രി, ദഹ്ഹ, റഫീഹി, യാന്ബാവി, സായിര്, ഖബീത്തി തുടങ്ങിയ പരമ്പരാഗത നൃത്തരൂപങ്ങള് ഓര്ക്കസ്ട്രയുടെ താളത്തിനൊപ്പം വേദിയില് പുനരാവിഷ്കരിക്കപ്പെട്ടു.
നാടന് കലാരൂപങ്ങളുടെ തനിമ ചോരാതെ തന്നെ അവയെ ഒരു വലിയ ഓര്ക്കസ്ട്ര പശ്ചാത്തലത്തില് അവതരിപ്പിക്കാന് കഴിഞ്ഞത് സംഘാടകരുടെ വലിയ വിജയമായി വിലയിരുത്തപ്പെടുന്നു. സൗദി അറേബ്യയുടെ സംഗീത പാരമ്പര്യത്തെ അന്താരാഷ്ട്ര നിലവാരത്തില് അവതരിപ്പിക്കുക എന്ന മ്യൂസിക് കമ്മീഷന്റെ ലക്ഷ്യത്തിലേക്കുള്ള പ്രധാന ചുവടുവെപ്പാണ് ഈ പരിപാടി. പൈതൃകത്തെ ബഹുമാനിക്കുന്നതോടൊപ്പം സമകാലിക കലാരൂപങ്ങളെ പ്രോത്സാഹിപ്പിക്കാനും ഇത്തരം വേദികള് സഹായിക്കുന്നു.
നേരത്തെ വിവിധ അന്താരാഷ്ട്ര നഗരങ്ങളില് വിജയകരമായി അവതരിപ്പിക്കപ്പെട്ട ഈ സംഗീത പരമ്പര, സൗദി സംഗീതത്തിന്റെ വൈവിധ്യവും ആഴവും ലോകത്തിന് മുന്നില് തുറന്നുകാട്ടുന്ന ഒന്നുകൂടിയായി മാറി.
Related News
