അബഹ- അസീറിന്റെ ഉയര്ന്ന മലനിരകള് ഇപ്പോള് ഒരു വെണ്ണക്കല് കൊട്ടാരം പോലെ സുന്ദരമാണ്. ശൈത്യകാലത്തിന്റെ കുളിരില്, അസീറിലെ കാര്ഷിക തട്ടുകളും മലഞ്ചെരിവുകളും വെള്ളയും പിങ്കും നിറമുള്ള ബദാം പൂക്കളാല് മൂടപ്പെട്ടിരിക്കുന്നു. അസീര് മേഖലയുടെ വൈവിധ്യമാര്ന്ന പരിസ്ഥിതിയെയും പുരാതനമായ കാര്ഷിക പാരമ്പര്യത്തെയും വിളിച്ചോതുന്ന ഒരു ശൈത്യകാല ചിത്രമായി ഈ കാഴ്ച മാറിയിരിക്കുകയാണ്.
അസീറിലെ അല്-സൗദ, ബല്സമര്, തനോമ, അല്-നമാസ് തുടങ്ങിയ മലനിരകളിലാണ് ബദാം മരങ്ങള് പ്രധാനമായും വ്യാപിച്ചു കിടക്കുന്നത്. ഇവിടുത്തെ ഭൂപ്രകൃതിയും തണുത്ത കാലാവസ്ഥയും ബദാം മരങ്ങളുടെ വളര്ച്ചയ്ക്ക് ഏറെ അനുയോജ്യമാണ്. പതിറ്റാണ്ടുകളായി ഈ മലയോര മേഖലയിലെ ജനങ്ങളുടെ ജീവിതത്തോടും സംസ്കാരത്തോടും ചേര്ന്നുനില്ക്കുന്ന ഒരു പരമ്പരാഗത വിളയാണിത്.
ഈ വര്ഷത്തെ അനുകൂലമായ കാലാവസ്ഥ കാരണം മലനിരകളില് ബദാം പൂക്കള് സമൃദ്ധമായി വിരിഞ്ഞുനില്ക്കുകയാണ്. ഇത് മികച്ച വിളവെടുപ്പ് സീസണിലേക്കാണ് വിരല് ചൂണ്ടുന്നത്. ഒരു സീസണില് ഒരു ബദാം മരത്തില് നിന്ന് ശരാശരി 5 മുതല് 6 കിലോഗ്രാം വരെ വിളവ് ലഭിക്കാറുണ്ട്. വിളവെടുപ്പിന്റെ വിവിധ ഘട്ടങ്ങള്ക്കനുസരിച്ചാണ് വിപണിയില് ഇതിന്റെ വില നിശ്ചയിക്കുന്നത്.
ബദാം കൃഷി പ്രാദേശിക സമ്പദ്വ്യവസ്ഥയെ ശക്തിപ്പെടുത്തുന്നതില് വലിയ പങ്കുവഹിക്കുന്നു. കര്ഷകരുടെ വരുമാനം വര്ദ്ധിപ്പിക്കുന്നതിനൊപ്പം കാര്ഷിക പ്രവര്ത്തനങ്ങളെ ഇത് ഉത്തേജിപ്പിക്കുകയും ചെയ്യുന്നു. ഇതിനുപുറമെ, പൂത്തുനില്ക്കുന്ന ഈ മനോഹര ദൃശ്യങ്ങള് കാണാന് നിരവധി സഞ്ചാരികള് എത്തുന്നതോടെ മേഖലയിലെ ഇക്കോ ടൂറിസം സാധ്യതകളും വര്ദ്ധിച്ചിരിക്കുകയാണ്.
ഗ്രാമീണ മേഖലകളുടെ വികസനം, പ്രകൃതിദത്തമായ പച്ചപ്പ് നിലനിര്ത്തല്, പരമ്പരാഗത കാര്ഷിക പൈതൃക സംരക്ഷണം എന്നിവ ലക്ഷ്യമിട്ടുള്ള സൗദി അറേബ്യയുടെ 'വിഷന് 2030' പദ്ധതിയുടെ ഭാഗമായാണ് ബദാം കൃഷിക്ക് ഇപ്പോള് കൂടുതല് പ്രാധാന്യം നല്കുന്നത്. അസീറിലെ ഈ വെളുത്ത വസന്തം പ്രകൃതിസ്നേഹികള്ക്കും സഞ്ചാരികള്ക്കും ഒരുപോലെ നയനമനോഹരമായ വിരുന്നാണ് ഒരുക്കുന്നത്.
Related News
