റിയാദ്: സൗദി അറേബ്യയുടെ വിവിധ ഭാഗങ്ങളില് ഇന്ന് (ഞായറാഴ്ച) ശക്തമായ മണല്ക്കാറ്റിന് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. റിയാദ്, ഖസീം, കിഴക്കന് പ്രവിശ്യ എന്നീ മേഖലകളിലാണ് മണല്ക്കാറ്റ് പ്രധാനമായും ബാധിക്കുക. ഇതിന്റെ ആഘാതം നജ്റാന് മേഖലയിലേക്കും വ്യാപിക്കാന് സാധ്യതയുണ്ട്.
ഈ പ്രദേശങ്ങളില് ഉപരിതല കാറ്റ് ശക്തമാകുന്നതോടെ പൊടിയും മണലും ഉയരാന് സാധ്യതയുണ്ട്. ഇത് റോഡുകളിലെ കാഴ്ചപരിധി ഗണ്യമായി കുറയ്ക്കും. താമസക്കാരും സന്ദര്ശകരും അതീവ ജാഗ്രത പാലിക്കണമെന്നും ബന്ധപ്പെട്ട അധികൃതര് നല്കുന്ന സുരക്ഷാ നിര്ദ്ദേശങ്ങള് കര്ശനമായി പാലിക്കണമെന്നും കാലാവസ്ഥാ കേന്ദ്രം അറിയിച്ചു.
വടക്കന് അതിര്ത്തി മേഖലയിലെ തര്ഫ് പ്രവിശ്യയില് ശക്തമായ ശൈത്യതരംഗത്തിന് സാധ്യതയുണ്ട്. ഇവിടെ താപനില പൂജ്യം ഡിഗ്രി മുതല് മൈനസ് 3 ഡിഗ്രി വരെ താഴാനും മഞ്ഞ് വീഴ്ചയ്ക്കും സാധ്യതയുണ്ടെന്ന് മുന്നറിയിപ്പുണ്ട്. മക്ക, അല്-ജൗഫ്, മദീന, അസീര്, വടക്കന് അതിര്ത്തികള് എന്നിവിടങ്ങളിലെ ചില ഭാഗങ്ങളില് വരും മണിക്കൂറുകളില് ശക്തമായ മൂടല്മഞ്ഞ് അനുഭവപ്പെട്ടേക്കാം.
വാഹനങ്ങള് ഓടിക്കുന്നവര് കുറഞ്ഞ കാഴ്ചപരിധി കണക്കിലെടുത്ത് വേഗം കുറയ്ക്കണമെന്നും ആരോഗ്യപ്രശ്നങ്ങളുള്ളവര് പൊടിപടലങ്ങളില്നിന്ന് സംരക്ഷണം ഉറപ്പാക്കണമെന്നും അധികൃതര് ഓര്മ്മിപ്പിച്ചു.
Related News
