റിയാദ്: കിംഗ് ഖാലിദ് അന്താരാഷ്ട്ര വിമാനത്താവളത്തിലെ പുതുതായി വികസിപ്പിച്ച രണ്ടാമത്തെ അന്താരാഷ്ട്ര ടെര്‍മിനല്‍ (Terminal 2) റിയാദ് ഗവര്‍ണര്‍ ഫൈസല്‍ ബിന്‍ ബന്ദര്‍ ബിന്‍ അബ്ദുല്‍ അസീസ് രാജകുമാരന്‍ ഉദ്ഘാടനം ചെയ്തു. ഇതോടൊപ്പം ഒന്നാം നമ്പറിലെയും രണ്ടാം നമ്പറിലെയും ടെര്‍മിനലുകളുടെ നവീകരണ പ്രവര്‍ത്തനങ്ങള്‍ പൂര്‍ത്തിയായതായും അദ്ദേഹം പ്രഖ്യാപിച്ചു.

ടെര്‍മിനല്‍ 1, 2 എന്നിവയുടെ സംയുക്ത വാര്‍ഷിക യാത്രാ ശേഷി 1.4 കോടി യാത്രക്കാരായി ഉയര്‍ന്നു. മുന്‍പ് ഇത് 60 ലക്ഷമായിരുന്നു. യാത്രാ ശേഷിയില്‍ 130 ശതമാനത്തിലധികം വര്‍ദ്ധനവാണ് ഈ പദ്ധതിയിലൂടെ കൈവരിച്ചിരിക്കുന്നത്.

ഓപ്പറേഷണല്‍ സിസ്റ്റങ്ങളുടെ നവീകരണം, ഡിപ്പാര്‍ച്ചര്‍ - അറൈവല്‍ ഏരിയകളുടെ വിപുലീകരണം, ഗതാഗത സൗകര്യങ്ങളുടെ മെച്ചപ്പെടുത്തല്‍ എന്നിവയിലൂടെ യാത്രാ നടപടികള്‍ കൂടുതല്‍ ലളിതവും വേഗത്തിലുമാക്കി.

യാത്രാ മേഖലയിലെ ദ്രുതഗതിയിലുള്ള വളര്‍ച്ചയ്ക്കുള്ള മറുപടിയാണ് ഈ വികസനമെന്ന് ഗതാഗത മന്ത്രി സാലിഹ് അല്‍ ജാസര്‍ അഭിപ്രായപ്പെട്ടു. കിംഗ് ഖാലിദ് വിമാനത്താവളത്തിന്റെ വളര്‍ച്ചയിലെ സുപ്രധാന ഘട്ടമാണിതെന്നും അദ്ദേഹം കൂട്ടിച്ചേര്‍ത്തു.

സിവില്‍ ഏവിയേഷന്‍ അതോറിറ്റി പ്രസിഡന്റ് അബ്ദുല്‍ അസീസ് അല്‍ ദുഐലിജ്, വിമാനത്താവള സൗകര്യങ്ങള്‍ മെച്ചപ്പെടുത്തുന്നതിലും പ്രവര്‍ത്തനക്ഷമത വര്‍ദ്ധിപ്പിക്കുന്നതിലും സൗദി അറേബ്യ കൈവരിക്കുന്ന വേഗമേറിയ പുരോഗതിയുടെ അടയാളമാണിതെന്ന് വ്യക്തമാക്കി.