മദീന: റമദാന് മാസത്തിന് മുന്നോടിയായി മദീനയിലെ മസ്ജിദുന്നബവിയില് പ്രവര്ത്തനക്ഷമത വര്ദ്ധിപ്പിക്കുന്നതിനായി 'സ്മാര്ട്ട് എന്ജിനീയറിങ് കമാന്ഡ് ആന്ഡ് കണ്ട്രോള് സെന്റര്' തുറന്നു. സൗദി ഹജ്ജ്-ഉംറ മന്ത്രി തൗഫീഖ് അല്-റബിയയാണ് സെന്ററിന്റെ ഉദ്ഘാടനം നിര്വഹിച്ചത്. ഇരു ഹറം കാര്യാലയ അതോറിറ്റി സി.ഇ.ഒ ഗാസി അല്-ഷഹ്റാനി ഉള്പ്പെടെയുള്ള പ്രമുഖര് ചടങ്ങില് പങ്കെടുത്തു.
തീര്ത്ഥാടകര്ക്കും സന്ദര്ശകര്ക്കും നല്കുന്ന സേവനങ്ങള് കൂടുതല് കാര്യക്ഷമമാക്കാനും സാങ്കേതിക വിദ്യയുടെ സഹായത്തോടെ ആരാധനാ സൗകര്യങ്ങള് മെച്ചപ്പെടുത്താനുമാണ് ഈ കേന്ദ്രം ലക്ഷ്യമിടുന്നത്.
നാല് ഷിഫ്റ്റുകളിലായി വിദഗ്ധരായ ജീവനക്കാര് 24 മണിക്കൂറും കേന്ദ്രത്തില് പ്രവര്ത്തിക്കും. റിപ്പോര്ട്ടുകള് വേഗത്തില് കൈകാര്യം ചെയ്യാനും ദൈനംദിന പ്രവര്ത്തനങ്ങള് തടസ്സമില്ലാതെ ഏകോപിപ്പിക്കാനും ഇതിലൂടെ സാധിക്കും. മസ്ജിദുന്നബവിയിലെ വിവിധ സേവനങ്ങള്, സന്ദര്ശകരുടെ പ്രതികരണങ്ങള്, ശുചിത്വം തുടങ്ങിയവ ഡിജിറ്റല് ഡാറ്റയുടെ സഹായത്തോടെ ഇന്ററാക്ടീവ് സ്ക്രീനുകളില് തത്സമയം നിരീക്ഷിക്കാനാവും.
കഴിഞ്ഞകാല വിവരങ്ങളും നിലവിലെ സാഹചര്യങ്ങളും വിശകലനം ചെയ്ത് ഭാവിയിലെ തിരക്കും ആവശ്യങ്ങളും പ്രവചിക്കാന് കഴിയുന്ന അത്യാധുനിക സംവിധാനമാണ് ഇവിടെ ഒരുക്കിയിരിക്കുന്നത്.
റമദാന്, ഹജ്ജ് തുടങ്ങിയ തിരക്കേറിയ സീസണുകളെ മികച്ച രീതിയില് നിയന്ത്രിക്കാന് ഈ കേന്ദ്രം സഹായകരമാകും. വിവരങ്ങള് കൃത്യമായി വിശകലനം ചെയ്ത് ഉചിതമായ തീരുമാനങ്ങള് വേഗത്തില് എടുക്കാന് സാധിക്കുമെന്നതാണ് ഇതിന്റെ മറ്റൊരു പ്രത്യേകത. മസ്ജിദുന്നബവിയിലെ ഓരോ മുക്കും മൂലയും കൃത്യമായി നിരീക്ഷിക്കപ്പെടുന്നതിലൂടെ സേവനങ്ങളിലെ പോരായ്മകള് അപ്പപ്പോള് തന്നെ പരിഹരിക്കാന് സാധിക്കുമെന്ന് അധികൃതര് വ്യക്തമാക്കി.
Related News
