മസ്‌കത്ത്: ഒമാനിലെ ഇന്ത്യന്‍ സ്‌കൂളുകളുടെ വാര്‍ഷിക അവധി പുനഃക്രമീകരിച്ച നടപടിക്കെതിരെ പ്രതിഷേധം ശക്തമാകുന്നു. ശാസ്ത്രീയമായ പഠനങ്ങളോ വിദഗ്ധ അഭിപ്രായമോ തേടാതെയാണ് അവധി ദിവസങ്ങള്‍ വെട്ടിക്കുറച്ചതെന്നാണ് രക്ഷിതാക്കളുടെയും അധ്യാപകരുടെയും പ്രധാന ആരോപണം. വിഷയത്തില്‍ അടിയന്തര ഇടപെടല്‍ ആവശ്യപ്പെട്ട് ഡോ. സജി ഉതുപ്പാന്റെ നേതൃത്വത്തിലുള്ള കൂട്ടായ്മ ഇന്ത്യന്‍ എംബസിക്ക് പരാതി നല്‍കി.

പുതിയ സര്‍ക്കുലര്‍ പ്രകാരം മെയ് 31-ന് സ്‌കൂള്‍ അടച്ച് ജൂലൈ 12-ന് വീണ്ടും തുറക്കും. ഒമാനിലെ കഠിനമായ ചൂട് അനുഭവപ്പെടുന്ന ജൂലൈ മാസത്തില്‍ സ്‌കൂളുകള്‍ തുറക്കുന്നത് കുട്ടികളുടെ ശാരീരിക-മാനസിക ആരോഗ്യത്തെ ബാധിക്കുമെന്ന് പരാതിയില്‍ ചൂണ്ടിക്കാട്ടുന്നു. യാത്രാ സൗകര്യങ്ങളെയും കുടുംബ സംഗമങ്ങളെയും ഈ മാറ്റം പ്രതികൂലമായി ബാധിക്കുമെന്നും അവധി നയം പുനഃപരിശോധിക്കണമെന്നുമാണ് രക്ഷിതാക്കളുടെ ആവശ്യം.