റിയാദ്: വിദേശ നിക്ഷേപകരെയും അസാധാരണ കഴിവുള്ള പ്രതിഭകളെയും ആകര്‍ഷിക്കുന്നതിന്റെ ഭാഗമായി സൗദി അറേബ്യ തങ്ങളുടെ പ്രീമിയം റെസിഡന്‍സി പദ്ധതിയില്‍ വിപ്ലവകരമായ മാറ്റങ്ങള്‍ വരുത്തുന്നു. ഈ വര്‍ഷം ഏപ്രിലില്‍ പുതിയ പരിഷ്‌കരണങ്ങള്‍ പ്രാബല്യത്തില്‍ വരുമെന്നാണ് റിപ്പോര്‍ട്ട്.

രാജ്യത്തിന്റെ സാമ്പത്തിക വൈവിധ്യവല്‍ക്കരണ പദ്ധതിയായ 'വിഷന്‍ 2030'-ന്റെ ഭാഗമായാണ് ഈ നീക്കം. പ്രധാനമായും അതിസമ്പന്നരെയാണ് ലക്ഷ്യമിടുന്നത്. 3 കോടി ഡോളറില്‍ (ഏകദേശം 250 കോടി രൂപ) കൂടുതല്‍ ആസ്തിയുള്ള വ്യക്തികള്‍ക്കായിരിക്കും മുന്‍ഗണന. വലിയ യാച്ചുകളുടെയും പ്രീമിയം ആസ്തികളുടെയും ഉടമകള്‍ക്ക് എളുപ്പത്തില്‍ റെസിഡന്‍സി ലഭ്യമാക്കും. ഉന്നത വിദ്യാഭ്യാസ രംഗത്ത് മികച്ച വിജയം കൈവരിച്ച വിദേശി വിദ്യാര്‍ത്ഥികള്‍ക്ക് രാജ്യത്ത് തന്നെ തുടരാന്‍ അവസരമൊരുക്കും. നൂതന ആശയങ്ങളുമായി വരുന്ന സ്റ്റാര്‍ട്ടപ്പ് ഉടമകള്‍ക്കും സംരംഭകര്‍ക്കും പ്രത്യേക ഇളവുകള്‍ നല്‍കും.

നിലവില്‍ ലിമിറ്റഡ് (വാര്‍ഷികം), അണ്‍ലിമിറ്റഡ് (സ്ഥിരം) എന്നിങ്ങനെ രണ്ട് വിഭാഗങ്ങളിലായി നല്‍കുന്ന പ്രീമിയം റെസിഡന്‍സി ഉടമകള്‍ക്ക് വിപുലമായ അവകാശങ്ങളാണ് സൗദി സര്‍ക്കാര്‍ നല്‍കുന്നത്. വിദേശികള്‍ക്ക് കഫീല്‍ അഥവാ സ്‌പോണ്‍സറുടെ സഹായമില്ലാതെ തന്നെ താമസിക്കാനും ജോലി ചെയ്യാനും സാധിക്കുമെന്നതാണ് ഇതിന്റെ ഒരു സവിശേഷത. സൗദിയില്‍ സ്വന്തമായി ഭൂമിയോ കെട്ടിടങ്ങളോ വാങ്ങാന്‍ അനുമതിയുണ്ടാകും. സ്വന്തം പേരില്‍ ബിസിനസ് ആരംഭിക്കാനും നിക്ഷേപങ്ങള്‍ നടത്താനും അനുവാദമുണ്ട്. രാജ്യത്തിന് പുറത്തേക്ക് പോകുന്നതിനും തിരിച്ചു വരുന്നതിനും പ്രത്യേകം എക്‌സിറ്റ്-റീ എന്‍ട്രി വിസകളുടെ ആവശ്യമില്ലെന്നതും ഇതിന്റെ പ്രത്യേകതയാണ്.

കഴിഞ്ഞ വര്‍ഷം വരെ ഏകദേശം 50,000-ത്തോളം അപേക്ഷകളാണ് പ്രീമിയം റെസിഡന്‍സിക്കായി സൗദിക്ക് ലഭിച്ചത്. ഇതില്‍ ഏകദേശം 10,000 പേര്‍ക്ക് നിലവില്‍ റെസിഡന്‍സി അനുവദിച്ചു കഴിഞ്ഞു. വരും വര്‍ഷങ്ങളില്‍ ഈ എണ്ണം വലിയ തോതില്‍ ഉയരുമെന്നാണ് അധികൃതരുടെ പ്രതീക്ഷ. കൂടുതല്‍ ബിസിനസ് സൗഹൃദമായ അന്തരീക്ഷം സൃഷ്ടിക്കുന്നതിലൂടെ ആഗോള നിക്ഷേപ ഹബ്ബായി സൗദി അറേബ്യയെ മാറ്റുകയാണ് ലക്ഷ്യം.