ലണ്ടന്: യമനില്നിന്നുള്ള യുഎഇയുടെ പിന്മാറ്റം സൗദി അറേബ്യയുമായുള്ള ബന്ധം കൂടുതല് ദൃഢമാക്കുന്നതിനും മേഖലയുടെ സുസ്ഥിരതയ്ക്കും വഴിതെളിക്കുമെന്ന് സൗദി വിദേശകാര്യ മന്ത്രി ഫൈസല് ബിന് ഫര്ഹാന് രാജകുമാരന്. പോളണ്ട് സന്ദര്ശനത്തിനിടെ വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
സൗദി അറേബ്യയും യുഎഇയും തമ്മിലുള്ള ബന്ധം മേഖലയുടെ സ്ഥിരതയ്ക്ക് അതീവ നിര്ണ്ണായകമാണെന്ന് പ്രിന്സ് ഫൈസല് വ്യക്തമാക്കി. ജിസിസിയിലെ പ്രധാന പങ്കാളി എന്ന നിലയില് യുഎഇയുമായി ശക്തമായ ബന്ധം നിലനിര്ത്താന് സൗദി എപ്പോഴും താല്പര്യപ്പെടുന്നു.
യമന് വിഷയത്തില് ഇരുരാജ്യങ്ങളും തമ്മില് മുന്പ് അഭിപ്രായവ്യത്യാസങ്ങള് ഉണ്ടായിരുന്നു എന്നത് അദ്ദേഹം സമ്മതിച്ചു. എന്നാല് യുഎഇ ഇപ്പോള് യമനില് നിന്ന് പൂര്ണ്ണമായി പിന്മാറാന് തീരുമാനിച്ച സാഹചര്യത്തില്, ആ ഉത്തരവാദിത്തം സൗദി അറേബ്യ ഏറ്റെടുക്കുമെന്ന് അദ്ദേഹം പറഞ്ഞു.
യുഎഇയുടെ ഈ പിന്മാറ്റം ഇരുരാജ്യങ്ങളുടെയും താല്പര്യങ്ങള് സംരക്ഷിക്കുന്നതിനും മേഖലയില് സമാധാനം ഉറപ്പാക്കുന്നതിനുമുള്ള അടിത്തറയായി മാറുമെന്ന് അദ്ദേഹം പ്രത്യാശ പ്രകടിപ്പിച്ചു.
സൗദി-യുഎഇ ബന്ധം കേവലം രണ്ട് രാജ്യങ്ങള് തമ്മിലുള്ളത് മാത്രമല്ല, മറിച്ച് മിഡില് ഈസ്റ്റിലെ മൊത്തത്തിലുള്ള സമാധാനത്തിന് അത് അത്യന്താപേക്ഷിതമാണെന്നും വിദേശകാര്യ മന്ത്രി കൂട്ടിച്ചേര്ത്തു.
Related News
