റിയാദ്: സൗദി അറേബ്യയുടെ ഭക്ഷ്യ വ്യവസായ മേഖലയില്‍ വന്‍ കുതിച്ചുചാട്ടം. കഴിഞ്ഞ നാല് വര്‍ഷത്തിനിടെ രാജ്യത്തെ ഭക്ഷ്യ കയറ്റുമതിയില്‍ 60 ശതമാനത്തിന്റെ വര്‍ധനവുണ്ടായതായി നാഷണല്‍ ഇന്‍ഡസ്ട്രിയല്‍ ഡെവലപ്മെന്റ് സെന്ററിലെ ഭക്ഷ്യവിഭാഗം വൈസ് പ്രസിഡന്റ് ഖാലിദ് അല്‍-ഷെഹ്രി അറിയിച്ചു. 2021-ല്‍ 1,300 കോടി റിയാലായിരുന്ന (3.4 ബില്യണ്‍ ഡോളര്‍) കയറ്റുമതി കഴിഞ്ഞ വര്‍ഷം അവസാനത്തോടെ 2,200 കോടി റിയാലായി ഉയര്‍ന്നു.

രാജ്യത്തെ ഭക്ഷ്യ സംസ്‌കരണ ശാലകളുടെ എണ്ണം നിലവില്‍ 1,900 ആയി വര്‍ധിച്ചിട്ടുണ്ട്. പ്രതിമാസം നിരവധി പുതിയ കമ്പനികളാണ് ഈ രംഗത്തേക്ക് വരുന്നത്. ഏകദേശം 20,000 കോടി റിയാല്‍ മൂല്യമുള്ള സൗദി ഭക്ഷ്യ വ്യവസായം, തൊഴിലവസരങ്ങള്‍ നല്‍കുന്ന കാര്യത്തില്‍ രാജ്യത്തെ രണ്ടാമത്തെ വലിയ വ്യാവസായിക മേഖലയായി മാറിയിരിക്കുന്നു.

ദേശീയ വ്യാവസായിക തന്ത്രം ആരംഭിച്ചതിന് ശേഷം പ്രാദേശിക, അന്തര്‍ദേശീയ കമ്പനികളില്‍ നിന്നായി 2,800 കോടി റിയാലിന്റെ പുതിയ നിക്ഷേപമാണ് ഈ മേഖലയിലേക്ക് എത്തിയത്. 2035-ഓടെ ഇത് 7,800 കോടി റിയാലിലെത്തിക്കുകയാണ് സര്‍ക്കാര്‍ ലക്ഷ്യം. സൗദി വ്യവസായ-ധാതു വിഭവ മന്ത്രി ബന്ദര്‍ അല്‍ഖൊറായെഫ് അടുത്തിടെ ജിദ്ദയിലെ രണ്ട്, മൂന്ന് വ്യാവസായിക നഗരങ്ങളില്‍ സന്ദര്‍ശനം നടത്തി. ജിദ്ദയില്‍ മാത്രം നാല് വ്യാവസായിക നഗരങ്ങളിലായി 3,000-ത്തിലധികം ഫാക്ടറികളുണ്ടെന്ന് സൗദി അതോറിറ്റി ഫോര്‍ ഇന്‍ഡസ്ട്രിയല്‍ സിറ്റീസ് സിഇഒ മാജിദ് അല്‍-അര്‍ഗൂബി വ്യക്തമാക്കി. സന്ദര്‍ശനത്തിനിടെ പ്രമുഖ സ്ഥാപനങ്ങളുടെ പുതിയ പദ്ധതികള്‍ മന്ത്രി ഉദ്ഘാടനം ചെയ്തു.

ഭക്ഷ്യ ഉല്‍പ്പാദനത്തില്‍ രാജ്യം മികച്ച സ്വയംപര്യാപ്തത കൈവരിച്ചുകൊണ്ടിരിക്കുകയാണ്. നിലവിലെ കണക്കുകള്‍ പ്രകാരം: കോഴി ഇറച്ചി: 75%, മത്സ്യം: 60%,
റെഡ് മീറ്റ്: 57%. പാല്‍, പാലുല്‍പ്പന്ന മേഖലയില്‍ രാജ്യം ഏറെ മുന്നിലാണ്.

ഫോര്‍ത്ത് ഇന്‍ഡസ്ട്രിയല്‍ റെവല്യൂഷന്റെ ഭാഗമായി ഫാക്ടറികളെ ഓട്ടോമേഷനിലേക്ക് മാറ്റാനുള്ള പ്രവര്‍ത്തനങ്ങള്‍ സജീവമാണ്. ഇത് തൊഴില്‍ മേഖലയിലെ സ്വദേശിവല്‍ക്കരണം ഊര്‍ജിതമാക്കാനും സഹായിക്കും. ജിദ്ദയിലെ 1.1 കോടി ചതുരശ്ര മീറ്റര്‍ വിസ്തൃതിയുള്ള ഫുഡ് ക്ലസ്റ്ററിന് പുറമെ ജിസാന്‍, അല്‍-ഖര്‍ജ് എന്നിവിടങ്ങളിലും പ്രത്യേക ഭക്ഷ്യ ക്ലസ്റ്ററുകള്‍ പ്രവര്‍ത്തിക്കുന്നുണ്ട്. 2030-ഓടെ സൗദിയിലെ ഭക്ഷ്യ വിപണിയുടെ മൂല്യം 21,400 കോടി റിയാലായി ഉയരുമെന്നാണ് പ്രതീക്ഷിക്കുന്നത്.