ദുബായ്: ശശി തരൂരിനെ സി.പി.എമ്മിലെത്തിക്കാന് താന് മധ്യസ്ഥ ചര്ച്ച നടത്തിയെന്ന രീതിയിലുള്ള മാധ്യമ റിപ്പോര്ട്ടുകളെ ശക്തമായി തള്ളി ലുലു ഗ്രൂപ്പ് ചെയര്മാന് എം.എ. യൂസഫലി. തനിക്ക് രാഷ്ട്രീയമില്ലെന്നും മാധ്യമങ്ങള് ഇത്തരം അനാവശ്യ ഗോസിപ്പുകളില് നിന്നും പരദൂഷണങ്ങളില് നിന്നും പിന്മാറണമെന്നും അദ്ദേഹം ദുബായില് ആവശ്യപ്പെട്ടു.
തന്റെ പേര് രാഷ്ട്രീയ നീക്കങ്ങളുമായി ബന്ധിപ്പിക്കുന്നത് അനാവശ്യമാണെന്നും തന്റെ ബിസിനസ് തിരക്കുകള്ക്കിടയില് ഇത്തരം ചര്ച്ചകള്ക്ക് പ്രസക്തിയില്ലെന്നും അദ്ദേഹം അടിവരയിട്ടു. ലോക സാമ്പത്തിക ഫോറത്തില് പങ്കെടുത്ത ശേഷം ദാവോസില് നിന്ന് സൂറിച്ചിലെത്തി, ഒരു ദിവസം നീണ്ട മീറ്റിംഗുകള്ക്ക് ശേഷം ദുബായിലേക്ക് മടങ്ങുന്നതിനിടെയാണ് ശശി തരൂരുമായി ചര്ച്ച നടത്തിയെന്ന വാര്ത്തകള് പ്രചരിച്ചത്. താന് വിമാനമിറങ്ങുന്നതിന് മുന്പേ ഇത്തരം വാര്ത്തകള് പടച്ചുവിടുന്നത് ശരിയല്ലെന്ന് അദ്ദേഹം പറഞ്ഞു.
ഇത്തവണ ശശി തരൂരിനെ കണ്ടിട്ടില്ല. ആറു മാസം മുന്പ് അദ്ദേഹം കേരളത്തില് വന്നപ്പോള് തന്റെ വീട് സന്ദര്ശിച്ചിരുന്നു. അതല്ലാതെ രാഷ്ട്രീയപരമായ യാതൊരു ചര്ച്ചകളും നടന്നിട്ടില്ല. മാധ്യമ പ്രവര്ത്തനം എന്നത് സത്യം അന്വേഷിക്കലാവണം എന്ന് യൂസഫലി ഓര്മ്മിപ്പിച്ചു.
'നാട്ടില് നിന്നായാലും വിദേശത്തായാലും മാധ്യമങ്ങള് ഇത്തരം ആവശ്യമില്ലാത്ത കാര്യങ്ങള് ചെയ്യരുത്. വാര്ത്തകളില് സത്യമുണ്ടെങ്കില് മാത്രമേ അത് പ്രക്ഷേപണം ചെയ്യാന് പാടുള്ളൂ. അനാവശ്യ ഗോസിപ്പുകള് ഒഴിവാക്കി മാധ്യമങ്ങള് ഉത്തരവാദിത്തം കാണിക്കണം.' തന്റെ വ്യക്തിപരമായ സൗഹൃദങ്ങളെ രാഷ്ട്രീയ കൂടുമാറ്റത്തിനുള്ള ചര്ച്ചകളായി വ്യാഖ്യാനിക്കുന്നതിലുള്ള അതൃപ്തി യൂസഫലി പ്രസ്താവനയിലൂടെ വ്യക്തമാക്കിയിട്ടുണ്ട്.
Related News
