റിയാദ്: സൗദി അറേബ്യയുടെ സിവില്‍ ഏവിയേഷന്‍ മേഖല 2025-ല്‍ വന്‍ വളര്‍ച്ച കൈവരിച്ചതായി ജനറല്‍ അതോറിറ്റി ഓഫ് സിവില്‍ ഏവിയേഷന്‍ (ഏഅഇഅ) അറിയിച്ചു. കഴിഞ്ഞ വര്‍ഷത്തെ അപേക്ഷിച്ച് ഒന്‍പത് ശതമാനം വര്‍ധനയോടെ യാത്രക്കാരുടെ എണ്ണം 14 കോടി പിന്നിട്ടു. റിയാദില്‍ ചേര്‍ന്ന നാഷണല്‍ ഏവിയേഷന്‍ സെക്ടര്‍ സ്ട്രാറ്റജി ആക്ടിവേഷന്‍ സ്റ്റിയറിംഗ് കമ്മിറ്റിയുടെ 19-ാമത് യോഗത്തിലാണ് ഈ കണക്കുകള്‍ പുറത്തുവിട്ടത്.

സൗദി വിഷന്‍ 2030-ന്റെ ഭാഗമായി പ്രതിവര്‍ഷം 15 കോടി വിനോദസഞ്ചാരികളെ ആകര്‍ഷിക്കുക എന്ന ലക്ഷ്യത്തിലേക്ക് രാജ്യം അതിവേഗം അടുക്കുകയാണ്. 2025-ല്‍ മാത്രം ഏകദേശം 12.2 കോടി സന്ദര്‍ശകരാണ് സൗദിയിലെത്തിയത്. രാജ്യത്തെ സാമ്പത്തിക വൈവിധ്യവല്‍ക്കരണത്തില്‍ വ്യോമയാന മേഖല നിര്‍ണായക പങ്കുവഹിക്കുന്നുണ്ടെന്ന് ജി.എ.സി.എ പ്രസിഡന്റ് അബ്ദുല്‍ അസീസ് അല്‍ ദുഐലെജ് പറഞ്ഞു.

സൗദിയില്‍ നിന്നുള്ള അന്താരാഷ്ട്ര വിമാന സര്‍വീസുകള്‍ 176 കേന്ദ്രങ്ങളിലേക്ക് വ്യാപിച്ചു. ലോകത്തിലെ ഏറ്റവും തിരക്കേറിയ മൂന്ന് വിമാന റൂട്ടുകള്‍ സൗദി കേന്ദ്രീകരിച്ചാണെന്നതും ശ്രദ്ധേയമാണ്. റിയാദ് എയര്‍, എയര്‍ അറേബ്യ അലയന്‍സ് തുടങ്ങിയ പുതിയ ദേശീയ വിമാനക്കമ്പനികള്‍ക്ക് അനുമതി നല്‍കിയതും, ഫെഡെക്‌സ് , സ്വിസ്‌പോര്‍ട്ട് തുടങ്ങിയ ആഗോള കമ്പനികള്‍ക്ക് ലൈസന്‍സ് നല്‍കിയതും നിക്ഷേപ സൗഹൃദ അന്തരീക്ഷം ശക്തമാക്കി.


2026-ലേക്കുള്ള വികസന പദ്ധതികളും യോഗം ചര്‍ച്ച ചെയ്തു. മുപ്പതിലധികം പുതിയ റൂട്ടുകള്‍: ആഗോളതലത്തില്‍ കൂടുതല്‍ നഗരങ്ങളിലേക്ക് സര്‍വീസ് വ്യാപിപ്പിക്കും. വിമാനത്താവളങ്ങളുടെ ശേഷി വര്‍ധിപ്പിക്കുന്നതിനും വികസന പ്രവര്‍ത്തനങ്ങള്‍ക്കുമായി സ്വകാര്യ മേഖലയെ കൂടുതല്‍ പങ്കാളികളാക്കും. ഹജ്ജ്, ഉംറ തീര്‍ത്ഥാടകര്‍ക്ക് മികച്ച യാത്രാനുഭവം ഉറപ്പാക്കാന്‍ നൂതന ലോജിസ്റ്റിക് സംവിധാനങ്ങള്‍ ഒരുക്കും.

ഫ്യൂച്ചര്‍ ഏവിയേഷന്‍ ഫോറം ഏപ്രിലില്‍
നാലാമത് 'ഫ്യൂച്ചര്‍ ഏവിയേഷന്‍ ഫോറം' വരുന്ന ഏപ്രിലില്‍ റിയാദില്‍ നടക്കും. അന്താരാഷ്ട്ര സിവില്‍ ഏവിയേഷന്‍ ഓര്‍ഗനൈസേഷന്റെ (ICAO) അംഗീകാരമുള്ള ഈ ഫോറം, ആഗോള വ്യോമയാന മേഖലയിലെ വെല്ലുവിളികളും ഭാവി സാധ്യതകളും ചര്‍ച്ച ചെയ്യുന്നതിനുള്ള പ്രധാന വേദിയായി മാറും.

മൂന്ന് ഭൂഖണ്ഡങ്ങളെ ബന്ധിപ്പിക്കുന്ന ആഗോള ലോജിസ്റ്റിക് ഹബ്ബായി സൗദി അറേബ്യയെ മാറ്റാനുള്ള 'നാഷണല്‍ ട്രാന്‍സ്‌പോര്‍ട്ട് ആന്‍ഡ് ലോജിസ്റ്റിക്‌സ് സ്ട്രാറ്റജി'യുടെ പുരോഗതിയും യോഗം വിലയിരുത്തി.