ന്യൂഡല്ഹി: ഭാരതവും അറബ് രാജ്യങ്ങളും തമ്മിലുള്ള രാഷ്ട്രീയ, സാമ്പത്തിക, സാംസ്കാരിക സഹകരണം കൂടുതല് ശക്തമാക്കാന് ലക്ഷ്യമിട്ടുള്ള രണ്ടാമത് ഇന്ത്യ-അറബ് വിദേശകാര്യ മന്ത്രിതല സമ്മേളനം ന്യൂഡല്ഹിയില് നടന്നു. ഗസ്സയിലെ സംഘര്ഷം അവസാനിപ്പിക്കാനുള്ള സമഗ്ര പദ്ധതി നടപ്പിലാക്കുക എന്നത് ഇരുവിഭാഗത്തിന്റെയും മുന്ഗണനാ വിഷയമാണെന്ന് യോഗം വിലയിരുത്തി.
സൗദി വിദേശകാര്യ മന്ത്രി ഫൈസല് ബിന് ഫര്ഹാന് രാജകുമാരന് വേണ്ടി ബഹുരാഷ്ട്ര അന്താരാഷ്ട്ര കാര്യങ്ങള്ക്കായുള്ള ഉപമന്ത്രി ഡോ. അബ്ദുറഹ്മാന് അല്-റാസ്സിയാണ് സൗദി അറേബ്യന് പ്രതിനിധി സംഘത്തെ നയിച്ചത്. ഇന്ത്യയിലെ സൗദി അംബാസഡര് ഹൈതം അല്-മാലികി, അറബ് ലീഗ് ഡിപ്പാര്ട്ട്മെന്റ് ഡയറക്ടര് കൗണ്സിലര് ഇമാദ് ഇല്യാസ് എന്നിവരും യോഗത്തില് പങ്കെടുത്തു.
ആഗോള ക്രമം വലിയ മാറ്റങ്ങള്ക്ക് വിധേയമായിക്കൊണ്ടിരിക്കുന്ന ഒരു നിര്ണ്ണായക ഘട്ടത്തിലാണ് ഈ കൂടിക്കാഴ്ചയെന്ന് ഇന്ത്യന് വിദേശകാര്യ മന്ത്രി എസ്. ജയശങ്കര് പറഞ്ഞു. 'കഴിഞ്ഞ ഒരു വര്ഷത്തിനിടെ പശ്ചിമേഷ്യന് മേഖലയിലുണ്ടായ നാടകീയമായ മാറ്റങ്ങള് ഈ ആഗോള പരിവര്ത്തനത്തിന്റെ തെളിവാണ്. ഗസ്സയിലെ സാഹചര്യം അന്താരാഷ്ട്ര സമൂഹത്തിന്റെ സവിശേഷ ശ്രദ്ധയാകര്ഷിച്ചിരിക്കുകയാണ്,' അദ്ദേഹം വ്യക്തമാക്കി.
സമ്മേളനത്തിനെത്തിയ അറബ് ലീഗ് പ്രതിനിധികളുമായി പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തി. അറബ് ലോകം ഇന്ത്യയുടെ വിപുലമായ അയല്പക്കത്തിന്റെ ഭാഗമാണെന്ന് പ്രധാനമന്ത്രി എക്സ് പ്ലാറ്റ്ഫോമില് കുറിച്ചു.
'ആഴത്തിലുള്ള നാഗരിക ബന്ധങ്ങളും ഊഷ്മളമായ ജനങ്ങള് തമ്മിലുള്ള ബന്ധവും സഹോദര്യവുമാണ് ഇന്ത്യയും അറബ് ലോകവും തമ്മിലുള്ളത്. സമാധാനം, പുരോഗതി, സ്ഥിരത എന്നിവയോടുള്ള പങ്കിട്ട പ്രതിബദ്ധത ഈ ബന്ധത്തെ കൂടുതല് ദൃഢമാക്കുന്നു,' - നരേന്ദ്ര മോദി പറഞ്ഞു.
Related News
