റിയാദ്- ഉംറ സേവന രംഗത്ത് പ്രവര്‍ത്തിക്കുന്ന 1,800 വിദേശ ട്രാവല്‍ ഏജന്‍സികളുടെ കരാറുകള്‍ ഇന്ന് (2026 ഫെബ്രുവരി 1, ഞായര്‍) മുതല്‍ ഹജ്ജ്-ഉംറ മന്ത്രാലയം താല്‍ക്കാലികമായി റദ്ദാക്കി. ആകെ പ്രവര്‍ത്തിക്കുന്ന 5,800 ഏജന്‍സികളില്‍ നിന്നാണ് വീഴ്ച വരുത്തിയ 1,800 എണ്ണത്തിനെതിരെ നടപടിയെടുത്തിരിക്കുന്നത്.

നിലവിലെ നടപടി പുതിയ ഉംറ വിസകള്‍ അനുവദിക്കുന്നതിനെ മാത്രമേ ബാധിക്കുകയുള്ളൂ. വീഴ്ചകള്‍ തിരുത്താനും സേവനങ്ങളുടെ നിലവാരം മെച്ചപ്പെടുത്താനുമായി ഈ ഏജന്‍സികള്‍ക്ക് 10 ദിവസത്തെ സമയം മന്ത്രാലയം അനുവദിച്ചിട്ടുണ്ട്. ഈ കാലയളവിനുള്ളില്‍ നിബന്ധനകള്‍ പാലിക്കുന്ന മുറയ്ക്ക് കരാറുകള്‍ പുനഃസ്ഥാപിക്കും.

നിലവില്‍ വിസയുള്ളവര്‍ക്കോ ബുക്കിംഗ് പൂര്‍ത്തിയാക്കിയവര്‍ക്കോ ഈ നടപടി മൂലം ആശങ്കപ്പെടേണ്ടതില്ലെന്ന് മന്ത്രാലയം വ്യക്തമാക്കി. അവര്‍ക്കുള്ള സേവനങ്ങളും യാത്രകളും തടസ്സമില്ലാതെ തുടരും. സേവനങ്ങളില്‍ ഗുണനിലവാരമില്ലായ്മയും ചട്ടങ്ങള്‍ പാലിക്കുന്നതിലെ വീഴ്ചയും ശ്രദ്ധയില്‍പ്പെട്ടതിനെത്തുടര്‍ന്നാണ് ഈ നടപടി.

അനുവദിച്ച 10 ദിവസത്തിനുള്ളില്‍ തെറ്റുകള്‍ തിരുത്താത്ത ഏജന്‍സികള്‍ക്കെതിരെ നിയമപരമായ തുടര്‍നടപടികള്‍ സ്വീകരിക്കുമെന്ന് ഹജ്ജ്-ഉംറ മന്ത്രാലയ വക്താവ് ഡോ. ഖസ്സാന്‍ അല്‍ നുഐമി വ്യക്തമാക്കി. തീര്‍ത്ഥാടകരുടെ അവകാശങ്ങള്‍ സംരക്ഷിക്കുന്നതിനും ഉംറ സംവിധാനത്തിന്റെ വിശ്വാസ്യത ഉറപ്പാക്കുന്നതിനുമാണ് ഈ നടപടി. സേവനദാതാക്കളുടെ പ്രകടനം വിലയിരുത്താന്‍ കൃത്യമായ മാനദണ്ഡങ്ങളും നിരീക്ഷണ സംവിധാനങ്ങളും മന്ത്രാലയം തുടരും.