മെല്‍ബണ്‍: ഓസ്ട്രേലിയന്‍ ഓപ്പണ്‍ പുരുഷ സിംഗിള്‍സില്‍ കിരീടം ചൂടി സ്പെയിന്റെ ലോക ഒന്നാം നമ്പര്‍ താരം കാര്‍ലോസ് അല്‍ക്കരാസ്. ഗ്ലാമര്‍ പോരാട്ടത്തില്‍ സെര്‍ബിയയുടെ കരുത്തനായ എതിരാളി നൊവാക് ജോക്കോവിച്ചിനെ തകര്‍ത്താണ് ജയം. അല്‍ക്കരാസിന്റെ കരിയറിലെ ആദ്യ ഓസ്ട്രേലിയന്‍ ഓപ്പണ്‍ കിരീടമാണിത്. അജയ്യനായി തുടര്‍ന്ന ജോക്കോവിച്ചിന്റെ പടയോട്ടത്തിനും 25-ാം ഗ്രാന്‍ഡ്സ്ലാം കിരീടമെന്ന മോഹത്തിനുമാണ് അല്‍ക്കരാസ് തടയിട്ടത്.

നാലു സെറ്റ് നീണ്ട ആവേശകരമായ പോരാട്ടത്തിനൊടുവിലാണ് ടെന്നിസ് ഇതിഹാസത്തെ അല്‍ക്കരാസ് കീഴടക്കിയത്. റോഡ് ലേവര്‍ അരീനയില്‍ നടന്ന ഫൈനലില്‍ 2-6, 6-2, 6-3, 7-5 എന്ന സ്‌കോറിനാണ് ജയം. മത്സരം മൂന്ന് മണിക്കൂര്‍ രണ്ട് മിനിറ്റ് നേരം നീണ്ടുനിന്നു.

ഇതോടെ നാല് ഗ്രാന്‍ഡ് സ്ലാം കിരീടങ്ങളും നേടി എക്കാലത്തേയും ഏറ്റവും പ്രായംകുറഞ്ഞ കരിയര്‍ ഗ്രാന്‍ഡ് സ്ലാം വിജയി എന്ന ചരിത്രം അല്‍ക്കരാസ് സ്വന്തമാക്കി. 24-ാം വയസ്സില്‍ റാഫേല്‍ നദാല്‍ തീര്‍ത്ത റെക്കോഡാണ് മറികടന്നത്.

അല്‍ക്കരാസിന്റെ ഏഴാം ഗ്രാന്‍ഡ്സ്ലാം കിരീടമാണിത്. ഫൈനലില്‍ ജോക്കോവിച്ച് മികച്ച പ്രകടനംതന്നെ നടത്തിയെങ്കിലും അല്‍ക്കരാസിന്റെ മുന്നേറ്റത്തിന് മുന്നില്‍ വീണു.