ജിദ്ദ: പുറംമോടിയിലേക്കല്ല, മറിച്ച് ഹൃദയവിശുദ്ധിയിലേക്കാണ് സ്രഷ്ടാവ് നോക്കുന്നതെന്നും അതുകൊണ്ടുതന്നെ ഒരു വിശ്വാസിയെ സംബന്ധിച്ചിടത്തോളം രഹസ്യമായി നന്മകള് ചെയ്യുന്നതിലൂടെ കൂടുതല് സൂക്ഷ്മതയുള്ളവനാകാന് കഴിയുമെന്നും അഹ്മദ് സദാദ് മദനി പറഞ്ഞു. പബ്ലിസിറ്റിക്ക് വേണ്ടിയും സമൂഹത്തിലെ സ്ഥാനമാനങ്ങള്ക്ക് വേണ്ടിയും ദാനധര്മ്മങ്ങളിലും സാമൂഹ്യ സേവനങ്ങളിലും ഇടപെടുന്നത് നാശമാണെന്നും രഹസ്യമായുള്ള ഇടപെടലുകള് മാത്രമാണ് ലോക രക്ഷിതാവിങ്കല് കുടുതല് പ്രതിഫലാര്ഹമായതെന്നും അദ്ദേഹം സദസിനെ ഉണര്ത്തി. ജിദ്ദ ഇന്ത്യന് ഇസ്ലാഹി സെന്ററില് 'ആരും അറിയാത്ത രഹസ്യമായ നന്മകള്' എന്ന വിഷയത്തില് സംസാരിക്കുകയായിരുന്നു അദ്ദേഹം.
രാത്രിയുടെ അന്ത്യയാമങ്ങളില് ഇരുകൈകളും സര്വ്വലോക സ്രഷ്ടാവിലേക്കുയര്ത്തി രഹസ്യമായി പാപമോചനമര്ത്ഥിക്കുന്ന അടിമയെ കാരുണ്യത്തിന്റെ ദൈവം ഏറെ ഇഷ്ടപെടും. മാനവരാശിക്ക് മോക്ഷത്തിന്റെ മാര്ഗ്ഗമായി അവതരിച്ച ഇസ്ലാം പരിചയപ്പെടുത്തുന്ന ദൈവം ഏറെ കരുണയുള്ളവനാണ്. തെറ്റുകള് സംഭവിക്കുക എന്നുള്ളത് മനുഷ്യസഹജമാണ്. ആ തെറ്റുകളില് പശ്ചാതപിച്ചുകൊണ്ട് തന്റെ ജീവിതത്തെ വിമലീകരിക്കുകയും നന്മയുടെ പാതയിലേക്ക് കൊണ്ടുപോകുവാന് ശ്രമിക്കുകയും ചെയ്യുക എന്നതാണ് മനുഷ്യനും ദൈവവും തമ്മിലുള്ള രഹസ്യമായ ബന്ധത്തിന്റെ കാതല്. വിശുദ്ധ ഖുര്ആനിന്റെയും പ്രവാചകചര്യയുടെയും സന്ദേശങ്ങളില് മുഴച്ചു നില്ക്കുന്നത് സ്രഷ്ടാവിന്റെ 'അര്റഹ്മാന് അഥവാ കാരുണ്യവാന്' എന്ന വിശേഷണമാണെന്നും അദ്ദേഹം പറഞ്ഞു.
ഇസ്ലാഹി സെന്റര് പ്രസിഡണ്ട് അബ്ബാസ് ചെമ്പന്റെ അധ്യക്ഷതയില് ചേര്ന്ന പരിപാടിയില് മുഹമ്മദ് നൂരിഷ വള്ളിക്കുന്ന് സ്വാഗതവും ഷാഫി മജീദ് ആലപ്പുഴ നന്ദിയും പറഞ്ഞു.
