ജിദ്ദ: ശാസ്ത്രീയ ഗവേഷണങ്ങളെ വാണിജ്യ സാധ്യതകളുമായി ബന്ധിപ്പിച്ചുകൊണ്ട് സൗദി അറേബ്യയുടെ കാര്ഷിക മേഖലയില് വിപ്ലവകരമായ മാറ്റങ്ങള് ലക്ഷ്യമിട്ട് പുതിയൊരു അധ്യായത്തിന് തുടക്കമാകുന്നു. അല്-ലൈത്ത് ഗവര്ണറേറ്റിലെ ഘുമൈഖ സെന്ററില് 10 ഹെക്ടര് ഭൂമിയിലാണ് ഈ പരീക്ഷണാടിസ്ഥാനത്തിലുള്ള അത്യാധുനിക ഫാം പ്രവര്ത്തിക്കുന്നത്. രാജ്യത്തെ ജലക്ഷാമം നേരിടാനും ആധുനിക സാങ്കേതികവിദ്യകള് പരീക്ഷിക്കാനുമുള്ള പ്രധാന വേദിയായി ഈ ഫാം മാറിയിരിക്കുകയാണ്.
ജലക്ഷാമം വലിയ വെല്ലുവിളിയായ സാഹചര്യത്തില്, അത് മറികടക്കാന് ഉതകുന്ന നൂതന ജലസേചന രീതികളാണ് ഇവിടെ അവലംബിക്കുന്നത്. തുള്ളി നന, സ്പ്രിംഗ്ലറുകള്, ഉപരിതല-അന്തര്ഭാഗ ജലസേചന സാങ്കേതികവിദ്യകള് എന്നിവ ഉപയോഗിച്ച് മുഴുവന് ജലസേചന സംവിധാനങ്ങളും സ്മാര്ട്ട് കണ്ട്രോളുകള് വഴിയാണ് നിയന്ത്രിക്കുന്നത്. ഇത് ജലവിനിയോഗം കൃത്യമായി നിരീക്ഷിക്കാനും പാഴാകുന്നത് ഒഴിവാക്കാനും സഹായിക്കുന്നു. ശുദ്ധജലത്തെ മാത്രം ആശ്രയിക്കാതെ, ശുദ്ധീകരിച്ചതും ലവണാംശം കുറച്ചതുമായ കടല്വെള്ളം കൃഷിക്ക് ഉപയോഗിക്കുന്നു എന്നത് ഈ പദ്ധതിയുടെ വലിയ സവിശേഷതയാണ്.
പച്ചക്കറികള്, പഴവര്ഗങ്ങള് എന്നിവയുടെ വന്തോതിലുള്ള ഉല്പ്പാദനത്തിന് അനുയോജ്യമായ മാതൃകകളാണ് ഇവിടെ വികസിപ്പിക്കുന്നത്. കുറഞ്ഞ ചെലവില് കൂടുതല് വിളവ് എന്ന ലക്ഷ്യത്തോടെയുള്ള ഈ സ്മാര്ട്ട് അഗ്രികള്ച്ചര് പദ്ധതി നിക്ഷേപകര്ക്ക് വലിയ അവസരങ്ങളാണ് തുറന്നുനല്കുന്നത്. പ്രാദേശിക ഭക്ഷ്യവിതരണ ശൃംഖലയെ ശക്തിപ്പെടുത്തുന്നതിനൊപ്പം കാര്ഷിക മേഖലയില് വൈദഗ്ധ്യമുള്ള ഒരു തൊഴില്സേനയെ വാര്ത്തെടുക്കാനും പദ്ധതി ലക്ഷ്യമിടുന്നു.
രാജ്യത്തെ തീരദേശ മേഖലകളില് വിജയകരമായി നടപ്പിലാക്കാന് കഴിയുന്ന ഒരു മാതൃകയാണിതെന്ന് അല്-ലൈത്ത് പരിസ്ഥിതി-ജല-കാര്ഷിക മന്ത്രാലയം ഡയറക്ടര് യഹ്യ ബിന് അബ്ദുറഹ്മാന് അല്-മഹാബി പറഞ്ഞു. ശാസ്ത്രീയ ഗവേഷണങ്ങളെ നിക്ഷേപ സാധ്യതകളുമായി സംയോജിപ്പിക്കുന്നതിലൂടെ കൃഷിയില് നിന്നുള്ള ലാഭം വര്ദ്ധിപ്പിക്കാന് കഴിയുമെന്നും അദ്ദേഹം കൂട്ടിച്ചേര്ത്തു. സൗദി അറേബ്യയുടെ സുസ്ഥിര വികസന ലക്ഷ്യങ്ങളോടും വിഷന് 2030-നോടും ചേര്ന്നുനില്ക്കുന്ന ഈ പദ്ധതി, സ്വകാര്യ മേഖലയെ നൂതന കാര്ഷിക പരിഹാരങ്ങള് സ്വീകരിക്കാന് പ്രേരിപ്പിക്കുന്നതുകൂടിയാണ്.
Related News
